اسلام آباد(روشن پاکستان نیوز) ترکیہ میں طیارہ گر کر تباہ ہونے کے نتیجے میں لیبیا کے فوجی سربراہ 4 ساتھیوں سمیت جاں بحق ہو گئے۔ طیارے کا ملبہ انقرہ کے نواحی ضلع ہیمانہ سے مل گیا۔
ترکیہ کے وزیر داخلہ کے مطابق طیارہ انقرہ ایسن بوغا ہوائی اڈے سے طرابلس کیلئے شام 8 بجکر 10 منٹ پر روانہ ہوا اور 8 بجکر 52 منٹ پر ایئر ٹریفک کنٹرول سے رابطہ منقطع ہوا۔
مزید پڑھیں: طیارہ حادثہ؛ عدالت کا نجی ایئرلائن کو 5 ارب 14کروڑ سے زائد ہرجانہ ادا کرنے کا حکم
ترک میڈیا کے مطابق تکنیکی خرابی پیدا ہونے کے بعد طیارے نے دوبارہ انقرہ کی جانب رخ موڑنے کی کوشش کی تاہم لینڈنگ سے قبل ہی حادثے کا شکار ہو گیا۔
طیارے میں لیبیا کے چیف آف اسٹاف سمیت 5 افراد سوار تھے۔ لیبیا کے وزیراعظم عبدالحمید الدبیبہ نے آرمی چیف کے جاں بحق ہونے کی تصدیق کر دی۔
رپورٹس کے مطابق لیبیا کے جنرل محمد علی الحداد نے ترکیہ کا دورہ کیا جہاں انہوں نے ترکیہ کے وزیر دفاع سے ملاقات کی۔ ترکیہ سے واپسی کے دوران جنرل محمد علی الحداد کا طیارہ تباہ ہو گیا۔
ترکیہ نے واقعے کے بعد فضائی حدود عارضی طور پر بند کر دی جبکہ سرچ اینڈ ریسکیو ٹیموں اور سکیورٹی اداروں کو ہائی الرٹ کر دیا گیا ہے۔
