اسلام آباد(روشن پاکستان نیوز) اسلام آباد پولیس کے اے ایس آئی علی اکبر کے قتل میں ملوث مرکزی ملزم پولیس مقابلے میں ہلاک ہوگیا۔
واقعہ تھانہ سبزی منڈی کی حدود میں اس وقت پیش آیا جب پولیس ٹیم معمول کی چیکنگ کے لیے ناکہ بندی پر موجود تھی۔
پولیس کے مطابق 3 موٹر سائیکلوں پر سوار 5 مسلح ملزمان نے پولیس کو دیکھتے ہی اندھا دھند فائرنگ کردی، جس کے نتیجے میں ایک اہلکار زخمی ہوگیا۔
پولیس نے جوابی کارروائی کی تو ایک حملہ آور زخمی حالت میں گرفتار ہوا جبکہ دو دیگر کو بھی موقع پر حراست میں لے لیا گیا۔
پولیس کے مطابق زخمی ملزم اسپتال میں دم توڑ گیا۔
مزید پڑھیں: اسلام آباد پولیس کی “اسلحہ سے پاک اسلام آباد” مہم جاری، 138 ملزمان گرفتار
حکام کا کہنا ہے کہ ہلاک ہونے والا شخص اے ایس آئی علی اکبر پر قاتلانہ حملے اور ان کے قتل کا مرکزی ملزم تھا، جبکہ اس کے قبضے سے شہید اہلکار کا سرکاری پستول بھی برآمد ہوا۔
یاد رہے کہ علی اکبر کو ہفتے کے روز آئی جے پی روڈ پر خنجر کے وار کر کے بے دردی سے قتل کیا تھا۔
موقع سے اسلحہ اور 2 موٹر سائیکلیں قبضے میں لی گئی ہیں، جن میں سے ایک موٹر سائیکل تھانہ شمس کالونی کی حدود سے چھینی گئی تھی۔
پولیس نے ملزمان کے دیگر ساتھیوں کی تلاش کے لیے سرچ آپریشن شروع کر دیا ہے۔
