اسلام آباد (کرائم رپورٹر): وفاقی دارالحکومت کے پوش علاقے بحریہ ٹاؤن فیز 4 کے سوک سینٹر میں ایک مبینہ ہنی ٹریپ اور بلیک میلنگ نیٹ ورک سامنے آنے کی اطلاعات ہیں۔ ذرائع کے مطابق ایک سپا سینٹر کی آڑ میں شہریوں کو غیر اخلاقی سرگرمیوں میں ملوث کرنے کے بعد بلیک میل کرنے کا سلسلہ جاری تھا۔
اطلاعات کے مطابق، اس نیٹ ورک میں شامل افراد پہلے گاہکوں کو مختلف طریقوں سے راغب کرتے اور بھاری رقوم وصول کرتے تھے۔ بعد ازاں مبینہ طور پر انہیں ہراساں کیا جاتا اور جھوٹے مقدمات یا بدنامی کی دھمکیاں دے کر مزید رقم طلب کی جاتی تھی۔
ملک بھر میں اے این ایف کا کریک ڈاؤن، 115 کلو منشیات برآمد، خاتون سمیت 5 ملزمان گرفتار
ذرائع کا کہنا ہے کہ متاثرہ افراد خوف اور سماجی دباؤ کے باعث قانونی کارروائی سے گریز کرتے رہے، جس کی وجہ سے یہ مبینہ گروہ کافی عرصے تک سرگرم رہا۔ بعض اطلاعات میں یہ بھی دعویٰ کیا جا رہا ہے کہ اس نیٹ ورک کو بااثر افراد کی پشت پناہی حاصل تھی، تاہم ان دعوؤں کی تاحال آزادانہ تصدیق نہیں ہو سکی۔
متعلقہ حکام کا کہنا ہے کہ معاملے کی تحقیقات جاری ہیں اور اگر الزامات درست ثابت ہوئے تو ملوث عناصر کے خلاف سخت قانونی کارروائی کی جائے گی۔ شہریوں کو بھی ہدایت کی گئی ہے کہ کسی بھی مشکوک سرگرمی کی فوری اطلاع قانون نافذ کرنے والے اداروں کو دیں۔
