راولپنڈی(عرفان حیدر)  سی پی او سید خالد ہمدانی کی ہدایت پر راولپنڈی پولیس نے ضلع بھر کے مختلف علاقوں میں وسیع پیمانے پر سرچ آپریشنز کیے، جن کا مقصد امن و امان کے قیام اور جرائم کی بیخ کنی تھا۔

ترجمان پولیس کے مطابق سرچ آپریشنز کے دوران 1375 گھر، 412 دکانیں، 28 ہوٹلز اور مجموعی طور پر 1709 سے زائد افراد کے کوائف کی جانچ پڑتال کی گئی۔ کارروائی کے دوران 76 غیر قانونی مقیم افغان باشندوں کو حراست میں لیا گیا۔

اس کے علاوہ آپریشنز میں 4 کباڑ خانوں، 3 بس/ٹرک اسٹینڈز اور مختلف مقامات پر کرایہ داروں کے کوائف کی بھی چیکنگ کی گئی۔ کرایہ داری کے اندراج نہ کرانے پر 21 مقدمات درج کیے گئے۔

مزید پڑھیں: علیمہ خان کے دسویں مرتبہ وارنٹ جاری، عدالت کا گرفتار کرکے پیش کرنے کا حکم

سرچ آپریشنز تھانہ کلر سیداں، روات، گوجر خان، چونترہ، دھمیال، کہوٹہ، جاتلی، صدر بیرونی، پیرودھائی، رتہ امرال، گنجمنڈی، سٹی، وارث خان، بنی، نیوٹاؤن، صادق آباد، صدر واہ، نصیر آباد، سول لائنز، مورگاہ اور کینٹ کے علاقوں میں انجام دیے گئے۔

ترجمان پولیس نے کہا کہ امن و امان کے قیام، جرائم کے خاتمے اور قانون کی بالادستی کو یقینی بنانے کے لیے تمام وسائل بروئے کار لائے جا رہے ہیں۔