اسلام آباد(روشن پاکستان نیوز) وزیر دفاع خواجہ آصف نے کہا ہے کہ افغان طالبان رجیم مسلسل برادر ممالک سے مذاکرات کیلئے درخواست کر رہی تھی، برادر ممالک کی درخواست پر پاکستان نے امن کی خاطر مذاکرات کی پیشکش کو قبول کیا۔
خواجہ آصف نے کہا کہ بعض افغان حکام کے بیانات ظاہر کرتے ہیں کہ طالبان رجیم میں دھوکہ دہی موجود ہے، طالبان رجیم کو ختم کرنے یا غاروں میں چھپنے پر مجبور کرنے کیلئے طاقت استعمال کرنے کی ضرورت نہیں۔
ان کا کہنا تھا کہ اگر ضرورت پڑی تو طالبان رجیم کو شکست دیکر لوگوں کیلئے مثال بنا سکتے ہیں، طالبان رجیم کی اگر خواہش ہو تو تورا بورا میں ماضی کی شکست کے مناظر، جہاں وہ دم دبا کر بھاگے تھے، دوبارہ دیکھنا یقیناً اقوام عالم کے لئے ایک نیا دلچسپ منظر ہو گا۔
وزیر دفاع نے کہ پاکستان اپنی سرزمین پر کسی بھی دہشتگردانہ یا خودکش حملے کو برداشت نہیں کرے گا ، کسی بھی مہم جوئی کا جواب سخت اور کڑوا ہو گا۔ طالبان رجیم کو چاہیے کہ اپنے انجام کا حساب ضرور رکھیں، کیونکہ پاکستان کو آزمانا ان کے لیے بہت مہنگا ثابت ہو گا۔
انہوں نے کہا کہ افسوس ہوتا ہے کہ طالبان رجیم صرف اپنی قابض حکمرانی برقرار رکھنے اور جنگی معیشت کو بچانے کے لیے افغانستان کو ایک اور تنازعے میں دھکیل رہی ہے۔ اپنی کمزوری اور جنگ کے دعوؤں کی کھوکھلی حقیقت کو بخوبی جاننے کے باوجود وہ طبل جنگ بجا کر بظاہر افغان عوام مے اپنی بگڑتی ہوئی ساکھ بچانے کی ناکام کوشش کر رہے ہیں۔
وزیر دفاع نے کہا کہ اگر افغان طالبان پھر بھی دوبارہ افغانستان اور اس کے معصوم عوام کو تباہ کرنے پر بضد ہیں تو پھر جو بھی ہونا ہے وہ ہو گا۔
انہوں نے کہا کہ جہاں تک سلطنتوں کے قبرستان کے بیانیے کا تعلق ہے، پاکستان خود کو ہرگز سلطنت نہیں کہتا، لیکن افغانستان، طالبان کی وجہ سے اپنے ہی لوگوں کے لیے ایک قبرستان سے کم نہیں۔ یہ کبھی سلطنتوں کا قبرستان تو نہیں رہا البتہ ہمیشہ بڑی طاقتوں کے کھیل کا میدان ضرور رہا ہے۔
پاکستان طالبان کے جنگجوؤں کو خبردار کرتا ہے کہ اپنے ذاتی فائدے کے لئے خطے میں بدامنی کے لیے جو کام وہ کررہے ہیں، انہوں نے شاید پاکستانی عزم اور حوصلے کو غلط انداز میں لیا ہے۔ اگر طالبان رجیم لڑنے کی کوشش کرے گی تو دنیا دیکھے گی کہ ان کی دھمکیاں صرف دکھاوا ہیں۔
