ممبئی(روشن پاکستان نیوز) بھارتی کرکٹ ٹیم کے تجربہ کار بلے باز چتیشور پجارا نے کرکٹ سے ریٹائرمنٹ کا اعلان کردیا ہے۔

انٹرنینشل کرکٹ کونسل (آئی سی سی) کے مطابق بھارتی ٹیسٹ کرکٹر چتیشور پجارا نے اتوار کے روز ہر طرز کی کرکٹ سے ریٹائرمنٹ کا اعلان کیا ہے۔ پجارا طویل عرصے سے بھارت کے ٹیسٹ اسکواڈ میں جگہ بنانے میں ناکام رہے تھے اور بی سی سی آئی نے مسلسل نوجوان کھلاڑیوں کو موقع دینا شروع کر دیا تھا۔

پجارا نے اپنے کیریئر کے دوران بھارت کے لیے شاندار خدمات انجام دیں۔ انہیں بھارت کے سب سے بڑے ٹیسٹ بیٹسمینوں میں شمار کیا جاتا ہے۔

انہوں نے آخری ٹیسٹ میچ 2023 میں آسٹریلیا کے خلاف کینگسٹن اوول میں کھیلا تھا۔ اس کے بعد انہیں ٹیم میں شامل نہیں کیا گیا حالانکہ آسٹریلیا کے 2025 کے دورے سے قبل ان کی واپسی کی افواہیں بھی گردش کر رہی تھیں تاہم سلیکٹرز نے کم تجربہ کار کھلاڑیوں پر اعتماد کیا۔

بھارت کی مایوس کن ٹیسٹ کارکردگی کے بعد ویرات کوہلی، روہت شرما اور روی چندرن ایشون جیسے سینئر کھلاڑی بھی فارمیٹ کو خیرباد کہہ چکے ہیں۔ ایسے میں پجارا کے لیے واپسی کے امکانات نہ ہونے کے برابر رہ گئے ہیں چنانچہ انہوں نے اب ریٹائرمنٹ کا فیصلہ کیا ہے۔

پجارا کا جذباتی بیان

چتیشور پجارا نے سوشل میڈیا اکاؤنٹ انسٹاگرام پر اپنے جذباتی پیغام میں کہا ہے کہ بھارتی جرسی پہننا، قومی ترانہ گانا اور ہر بار میدان میں اپنی بھرپور کوشش کرنا ان لمحات کو الفاظ میں بیان کرنا ناممکن ہے لیکن جیسا کہ کہا جاتا ہے ہر اچھی چیز کا ایک اختتام ہوتا ہے۔ اسی شکر گزاری کے ساتھ میں بھارتی کرکٹ کے تمام فارمیٹس سے ریٹائر ہونے کا اعلان کرتا ہوں۔ آپ سب کی محبت اور تعاون کے لیے شکریہ۔‘

انہوں نے مزید کہا کہ وہ ہمیشہ اپنے ساتھی کھلاڑیوں، کوچز اور ان تمام افراد کے شکر گزار رہیں گے جنہوں نے ان کے کریئر کے دوران ان کی مدد کی۔

پجارا کا کیریئر

چتیشور پجارا نے بھارت کے لیے 103 ٹیسٹ میچز میں 19 سنچریز اور 35 نصف سنچریز اسکور کیں اور 43.60 کی اوسط سے 7195 رنز بنائے۔ ٹیسٹ ٹیم کے اہم اور مستقل رکن صرف پانچ ون ڈے انٹرنیشنل میں بھارت کی نمائندگی کرسکے۔

مزید پڑھیں: ایشیا کپ کے لیے قومی اسکواڈ کا اعلان، بابر اور رضوان ٹیم سے باہر

وہ طویل اننگز کھیلنے اور مستحکم بیٹنگ کے باعث بھارت کی ٹیسٹ کرکٹ کی ریڑھ کی ہڈی سمجھے جاتے تھے، ان کے نام کئی یادگار اننگز ہیں، خصوصاً آسٹریلیا کے خلاف سیریز میں ان کی شاندار کارکردگی ہمیشہ یاد رکھی جائے گی۔

چتیشور پجارا کے ریٹائرمنٹ کے بعد بھارتی ٹیسٹ کرکٹ کا ایک سنہری باب ختم ہو گیا ہے۔ انہیں کرکٹ کی تاریخ میں ہمیشہ ایک مزاحمتی اور محنتی بلے باز کے طور پر یاد رکھا جائے گا۔

واضح رہے کہ 2024 میں روی چندرن ایشون اور رواں برس کے اوائل میں ویرات کوہلی اور روہت شرما بھی ٹیسٹ کرکٹ سے ریٹائرمنٹ لے چکے ہیں۔