راولپنڈی(روشن پاکستان نیوز) پاک فوج کے شعبہ تعلقات عامہ (آئی ایس آر) کے ڈائریکٹر جنرل (ڈی جی) لیفٹیننٹ جنرل احمد شریف چوہدری نے کہا ہے کہ بھارت بطور ریاست پاکستان میں دہشت گردی کر رہا ہے، پاکستان میں بھارتی دہشت گرد نیٹ ورک ملا، پہلگام حملے کے اب تک کوئی ثبوت نہیں دیے گئے۔
پاک فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف میڈیا کو بریفنگ دیتے ہوئے بتایا کہ آج کی پریس کانفرنس کا مقصد آپ کو بتانا ہے کہ کیسے بھارت پاکستان میں دہشت گردی پھیلا رہا ہے، بھارت بطور ریاست دہشت گردی کر رہا ہے، پہلگام واقعے کو 7 دن گزرگئے ہیں لیکن اب تک بھارت کی جانب سے لگائے گئے الزامات سے متعلق اب تک کوئی ثبوت فراہم نہیں کیے گئے ہیں۔
ترجمان پاک فوج نے کہا کہ بھارت پاکستان میں دہشتگردی کا نیٹ ورک چلا رہا ہے، دہشتگردوں کو ہم ممکن مدد دی جا رہی ہے، 25 اپریل کو ایک بھارتی ٹرینڈ افضل مجید کو جہلم سے پکڑا گیا، ڈھائی کلو کی آئی ڈی، موبائل اور کیش برآمد ہوا، اس کے گھر سے 10 لاکھ کیش اور بھارتی ڈرون برآمد ہوا۔
ڈی جی آئی ایس پی آر نے بتایا کہ ایسے ثبوت ہیں جو کوئی بھی کریڈیبل ایجنسی دیکھ سکتی ہے، دہشتگردی کا ہینڈلر بھارتی آرمی کا صوبیدارسکھوندر ہے، بھارتی صوبیدار نے کسی کے ذریعے آئی ڈی پہنچائی، وہ کہہ رہا ہے کہ پارسل نکل گیا آپ وقت پر پہنچ جاؤ، صوبیدار کہتا ہے میں لوکیشن بھیجتا ہوں، اس لوکیشن پر میپ پر ڈائریکشن کر لینا۔
ترجمان پاک فوج نے کہا کہ بھارت اپنی فوج کے ذریعے دہشتگردی کروارہا ہے، میجر سندیپ ورما اس دہشتگردی کو پلان کر رہا ہے، میجر سندیپ بھارتی فوج کس سرونگ آفیسر ہے۔
دہشتگرد مجید کو ہائیر کرنے کی آڈیو بھی سامنے آگئی
میڈیا کو بریفنگ کے دوران دہشتگرد مجید کو ہائیر کرنے کی آڈیو چلائی گئی۔ لیفٹیننٹ جنرل احمد شریف نے بتایا کہ میجرسندیپ ٹیرر فنانسنگ کی تفصیل بتا رہا ہے، یہ ہیں ریاست دہشتگردی کے ناقابل تردید ثبوت، کہتے ہیں دہشتگردی کرو اور پھر اسے اچھالو، آئی ای ڈیز کو ڈرونز کے ذریعے بھیجا جاتا ہے۔ دہشتگردوں کی آن لائن ٹریننگ کی جا رہی ہے۔ بھارتی میجر کہتا ہے لاہور سے بلوچستان تک کارروائی کر رہے ہیں، یہ را نہیں بھارتی فوج کر رہی ہے۔
ڈی جی آئی ایس پی آر نے بتایا کہ بھارتی حکومت اپنی فوج سے یہ کام کروا رہی ہے، 2024 میں صوبیدار سکھوندر نے دہشتگرد کو واٹس ایپ پر لوکیشن دی، دہشت گرد کو کہا گیا کہ وہاں تمہیں آئی ڈی ملے گی۔ 13 اکتوبر ضلع باغ میں فوجی گاڑی پر آئی ڈی بلاسٹ کی جاتی ہے، اس حملے میں پاک فوج کے 3 جوان شدید زخمی ہوتے ہیں۔
ترجمان پاک فوج نے بتایا کہ اس حملے کے بعد 1 لاکھ 80 ہزار اسکے اکاؤنٹ میں بھیجے جاتے ہیں، 18 نومبر کو دہشتگردی کو آخری پیمنٹ ہوئی، 22 نومبر کو ہیڈ مرالہ میں اسے لوکیشن دی جاتی ہے، اس دوارن ڈرون کریش کر جاتا ہے، وہی ڈرون اس کے گھر سے ملتا ہے، دہشت گردی جلال پور جٹاں میں آرمی کی گاڑی پر دھماکا خیز مواد لگاتا ہے، اس دھماکے میں 4 جوان زخمی ہوئے تھے۔
دہشتگرد مجید اور بھارتی آرمی کے ہینڈلر کی آڈیو بھی سنوائی گئی
ترجمان پاک فوج نے میڈیا کو بریفنگ میں بتایا کہ یہ آئی ڈی لگانے پر 6 لاکھ 6 ہزار روپے دیئے جاتے ہیں، 18 مارچ کو اسے کوٹلی میں آئی ای ڈی لگانے کی لوکیشن دی جاتی ہے، وہاں اسے سیکیورٹی فورسز کی لوکیشن نظر آتی ہے، وہ بتاتا ہے کہ آرمی موجود ہے میں وہاں نہیں جا سکتا، وہ آئی ای ڈی اسکول کے بچے ریکور کرتے ہیں۔
ڈی جی آئی ایس پی آر نے بتایا کہ بھارتی میڈیا خبر دیتا ہے کہ بھارتی فورسز نے بڑی دہشتگردی ناکام بنا دی، اس کام کے بھی دہشتگرد کو 60 ہزار روپے دیے جاتے ہیں، پھر دہشتگرد ایک اور آئی ای ڈی وصول کرتا ہے۔ بھارتی فوج کا جونیئر کمیشنڈ سرونگ آفیسرکہہ رہا ہے معصوموں کو نشانہ بناؤ، کیا یہ لوگ انسان ہیں؟ یہ ریاستی اسپانسرڈ کراس بارڈر دہشت گردی ہے، فتنہ الخوارج کے دہشتگردوں نے بھارتیوں کے حکم پر کاروائیاں تیز کیں۔
میڈیا کو بریفنگ دیتے ہوئے لیفٹیننٹ جنرل احمد شریف نے بتایا کہ پاکستان کی مسلح افواج اور عوام کو سیلوٹ پیش کرتے ہیں، اتنی بڑی دہشتگردی کے باوجود قوم بہادری سے کھڑی ہے، قوم روزانہ کی بنیاد پر دہشتگردی کی آنکھوں میں آنکھیں ڈال کر دیکھتی ہے، پاکستان کو کوئی ختم نہیں کر سکتا۔
ڈی جی آئی ایس پی آر لیفٹیننٹ جنرل احمد شریف نے کہا کہ موجودہ صورتحال پر کل تفصیلی بریفنگ دی جائے گی، کل سوال جواب بھی لیے جائیں گے۔
