اسلام آباد(روشن پاکستان نیوز) قومی اسمبلی میں غزہ میں اسرائیلی قتل و غارت گری کے خلاف قرار داد متفقہ طور پر منظور کرلی گئی۔
قومی اسمبلی میں غزہ میں اسرائیل کے مظالم کے خلاف قرار داد وزیر قانون اعظم نذیر تارڑ نے پیش کی۔ قرار داد میں کہا گیا ہے کہ یہ ایوان غزہ میں حالیہ اسرائیلی مظالم کی سخت مذمت کرتا ہے۔
قرارداد میں کہا گیا ہے کہ پاکستان ارض فلسطین پر فلسطینیوں کے حق کی غیر متزلزل حمایت جاری رکھےگا۔ قرارداد میں مطالبہ کیا گیا کہ عالمی برادری فلسطینی ریاست کے قیام کیلئے ٹھوس اقدامات اٹھائے۔
قومی اسمبلی نے اسرائیلی مظالم کے خلاف قرارداد متفقہ طور پر منظور کرلی۔
دوسری جانب اسرائیل نے غزہ پر زمینی اور فضائی حملے بڑھا دیے اور گزشتہ 24 گھنٹوں میں 35 مقامات کو نشانہ بنایا جس کے نتیجے میں مزید 40 سے زیادہ فلسطینی شہید ہوگئے۔
غزہ میں شہدا کی تعداد تقریباً 51 ہزار تک جا پہنچی ہے۔
مزید پڑھیں: اسرائیلی فوج کی غزہ پر بمباری کا سلسلہ جاری، مزید 39 فلسطینی شہید کردیے
