نوشہرہ(روشن پاکستان نیوز) خیبر پختونخوا کے ضلع نوشہرہ میں نامعلوم افراد کی فائرنگ سے پولیس افسر شہید ہوگیا، گولی لگنے سے گاڑی بے قابو ہو کر کھائی میں جاگری۔
پولیس کے مطابق نوشہرہ میں خشکی روڈ پر نامعلوم افراد نے فائرنگ کردی، جس کے نتیجے میں اے ایس آئی الیاس خان شہید ہوگیا، متوفی الیاس خان تھانہ نوشہرہ کینٹ میں تعینات تھا، گولی لگنے سے پولیس اہلکار سے گاڑی بے قابو ہوکر کھائی میں گرگئی، لاش کو پوسٹ مارٹم کے لئے اسپتال منتقل کر دیا گیا۔
پولیس حکام نے مزید بتایا کہ واردات کے بعد ملزمان فرار ہوگئے، جن کی گرفتاری کے لئے علاقے میں سرچ آپریشن شروع کر دیا گیا ہے۔
دوسری جانب شہید پولیس اہلکار کی نماز جنازہ پولیس لائن نوشہرہ میں ادا کردی گئی، نماز جنازہ میں پولیس، آرمی، ضلعی انتطامیہ ، سیاسی و سماجی شخصیات اور علاقہ معززین نے بڑی تعداد میں شرکت کی۔ شہید کی تدفین آبائی علاقے میں سرکاری اعزاز کے ساتھ کی جائے گی۔
مزید پڑھیں: خشکی میں نامعلوم افراد کی فائرنگ، اے ایس آئی الیاس خان موقع پر جاں بحق
