راولپنڈی (روشن پاکستان نیوز)راولپنڈی میں پہلے ٹیسٹ میچ کے دوران سلو اوور ریٹ کے قصوروار پائے جانے کے بعد پاکستان اور بنگلہ دیش کے آئی سی سی ورلڈ ٹیسٹ چیمپئن شپ کے فائنل میں پہنچنے کے امکانات کو دھچکا لگا ہے۔انٹرنیشنل کرکٹ کونسل کی جانب سے جاری پریس ریلیز میں کہا گیا ہے کہ میزبان پاکستان ٹیسٹ میچ کے دوران 6 اوورز کم پایا گیا اور اسے 6ورلڈ ٹیسٹ چیمپئن شپ پوائنٹس سے محروم ہونا پڑا، جبکہ مہمان بنگلہ دیش جس نے اپنے ایشیائی حریف پر 10 وکٹوں سے فتح حاصل کی تھی،کو 3 اوورز کم پائے جانے پر3 پوائنٹس سے محروم کردیا گیا۔

پاکستان پر میچ فیس کا 30 فیصد جرمانہ جبکہ بنگلہ دیش پر 15 فیصد جرمانہ عائد کیا گیاہے ۔پاکستانی ٹیم کے کپتان شان مسعود اور بنگلہ دیش کے کپتان نجم الحسین شانتو نے جرم کا اعتراف کیا اور مجوزہ پابندیوں کو قبول کر لیا، اس لیے باقاعدہ سماعت کی ضرورت نہیں تھی۔

اس کے علاوہ بنگلہ دیشی کرکٹر شکیب الحسن پر ان کی میچ فیس کا 10 فیصد جرمانہ اور آئی سی سی کوڈ آف کنڈکٹ کے لیول 1 کی خلاف ورزی پر ایک ڈیمیرٹ پوائنٹ بھی عائد کیا گیا ہے۔ شکیب الحسن نے دوسری اننگز کے 33ویں اوور میں محمد رضوان کی طرف گیند پھینکی تھی۔شکیب الحسن کو آئی سی سی کے ضابطہ اخلاق کے آرٹیکل 2.9 کے مطابق پلیئرز اور پلیئر سپورٹ پرسنل کے تحت جرمانہ کیا گیا ہے۔