صوفیہ: بلغاریہ میں خاتون صحافی سونیا کولتوکلیوا کے ساتھ پیش آنے والے واقعے پر شدید ردعمل سامنے آیا ہے، جہاں پارلیمنٹ کی اسپیکر میہیلا ڈوتسووا سے سوال پوچھنے کی کوشش کے دوران ایک سکیورٹی اہلکار نے مبینہ طور پر انہیں دھکا دے کر زمین پر گرا دیا۔ واقعہ 22 اکتوبر 2026 کو دارالحکومت صوفیہ میں پیش آیا، جس کے بعد صحافتی تنظیموں اور سیاسی اپوزیشن نے واقعے کی مذمت کرتے ہوئے ذمہ داروں کے احتساب کا مطالبہ کیا ہے۔
اطلاعات کے مطابق، پریس ایجنسی ’پِک‘ سے وابستہ رپورٹر سونیا کولتوکلیوا پارلیمنٹ کی اسپیکر سے سوال کرنے کے لیے ان کی گاڑی کے قریب پہنچیں تو نیشنل پروٹیکشن سروس کے ایک اہلکار نے انہیں پیچھے کی جانب دھکیل دیا، جس سے وہ فٹ پاتھ پر گر گئیں۔ رپورٹس کے مطابق، اس واقعے میں ان کے کندھے کی ہڈی ٹوٹ گئی اور انہیں صوفیہ کے سینٹ صوفیہ ہسپتال منتقل کیا گیا، جہاں ان کا علاج جاری ہے۔
خاتون صحافی کو ہراساں کرنے اور نازیبا ویڈیو اپ لوڈ کرنے پر ٹک ٹاکر شاہزیب سیالکوٹی گرفتار
واقعے کی سامنے آنے والی ویڈیو میں صحافی کو زمین پر گرا ہوا دیکھا جا سکتا ہے، جبکہ اسپیکر کا قافلہ وہاں سے روانہ ہوگیا۔ اس واقعے پر بلغاریہ میں عوامی اور سیاسی سطح پر غم و غصے کا اظہار کیا جا رہا ہے۔ صحافتی تنظیموں اور اپوزیشن رہنماؤں نے اسے صحافیوں کی سلامتی اور آزادیٔ صحافت سے متعلق سنگین معاملہ قرار دیتے ہوئے اسپیکر اور سکیورٹی ادارے کے سربراہ سے جواب طلبی اور استعفے کا مطالبہ کیا ہے۔
میڈیا رپورٹس کے مطابق، صحافی کو دھکا دینے کے الزام میں نیشنل پروٹیکشن سروس کے اہلکار کو حراست میں لے لیا گیا ہے اور واقعے کی تحقیقات شروع کر دی گئی ہیں۔ حکام کی جانب سے تحقیقات کے نتائج سامنے آنے کے بعد مزید تفصیلات واضح ہوں گی۔
