جدہ(روشن پاکستان نیوز) پنجاب کے وزیرِ جیل خانہ جات رانا منان خان عمرہ کی سعادت حاصل کرنے کے لیے سعودی عرب پہنچے تو مسلم لیگ (ن) سعودی عرب کے رہنماؤں چوہدری منیر احمد گجر اور رانا عبداللہ راجپوت کی جانب سے ان کے اعزاز میں جدہ کے ایک مقامی ریسٹورنٹ میں پرتکلف عشائیے کا اہتمام کیا گیا۔ تقریب میں مرکزی جنرل سیکرٹری اور فوکل پرسن پرائم منسٹر یوتھ پروگرام ملک منظور حسین، مسلم لیگ (ن) کے عہدیداران و کارکنان، پاک کمیونٹی کی سرکردہ شخصیات، پاکستان انویسٹر فورم اور میڈیا نمائندگان نے بھرپور شرکت کی۔
مہمانِ خصوصی رانا منان خان نے اپنے اعزاز میں شاندار تقریب کے انعقاد پر ملک منظور حسین، چوہدری منیر گجر اور رانا عبداللہ راجپوت کا شکریہ ادا کیا۔ اس موقع پر انہوں نے کہا کہ پاکستان ترقی کی راہ پر گامزن ہو چکا ہے، مہنگائی میں کمی آ رہی ہے اور ترقی و خوشحالی کے اہم منصوبے شروع ہو چکے ہیں۔ انہوں نے بتایا کہ جیلوں میں قیدیوں کو بہتر سہولیات فراہم کرنے اور انہیں ہنرمند بنانے کے لیے عملی اقدامات جاری ہیں، جبکہ اوورسیز پاکستانیوں کے لیے بھی خصوصی اور شاندار منصوبے متعارف کرائے جا رہے ہیں۔ رانا منان خان نے پاکستان اور سعودی عرب کے درمیان روحانی اور لازوال تعلقات کو بھی اجاگر کیا۔
تقریب سے خطاب کرتے ہوئے ملک منظور حسین، چوہدری بلو شیر وڑائچ اور چوہدری منیر گجر نے رانا منان خان کو عمرہ کی سعادت حاصل کرنے پر مبارکباد پیش کی اور مسلم لیگ (ن) کے لیے ان کی خدمات اور جیل اصلاحات کے اقدامات کو سراہا۔
بعد ازاں صحافیوں سے گفتگو میں رانا منان خان نے وزیراعلیٰ پنجاب کی کارکردگی کی تعریف کرتے ہوئے کہا کہ مسلم لیگ (ن) کی قیادت میں جلد تمام مسائل پر قابو پا لیا جائے گا۔
تقریب کا آغاز تلاوتِ کلامِ پاک سے ہوا جس کی سعادت احمد خان سواتی نے حاصل کی۔ اس موقع پر کیک بھی کاٹا گیا، پاکستان اور سعودی عرب کی ترقی و خوشحالی کے لیے خصوصی دعا کی گئی اور شرکاء کی پرتکلف عشائیے سے تواضع کی گئی۔
