پشاور(روشن پاکستان نیوز) خیبر پختونخوا حکومت نے حال ہی میں ہری پور میں ہونے والے ضمنی الیکشن میں مبینہ دھاندلی کی شکایات پر انکوائری کا فیصلہ کیا ہے۔

جیو نیوز سے گفتگو کرتے ہوئے معاون خصوصی برائے اطلاعات خیبر پختونخوا شفیع جان نے کہا کہ وزیراعلیٰ سہیل آفریدی نے ہری پور ضمنی الیکشن کی انکوائری کا حکم دیا ہے، کلاس فور سے لے کر ڈی سی تک انکوائری ہو گی، کوئی ملوث پایا گیا تو سخت سزا دیں گے۔

شفیع جان کا کہنا تھا ہم سمجھتے ہیں کہ ہمارے ماتحت افسران ملوث نہیں، پھر بھی انکوائری کر رہے ہیں، میرے خیال میں سہیل آفریدی نے جس طرح انتخابات کا انعقاد کیا، اس کی مثال نہیں ملتی۔

مزید پڑھیں: ن لیگ کو ووٹر کے بغیر الیکشن لڑنے کی عادت پڑ گئی ہے، چودھری پرویز الٰہی

انہوں نے کہا کہ ہم الیکشن کمیشن کو ہری پور انتخابات میں دھاندلی سے متعلق ریفرنس بھی بھیج رہے ہیں، ہم پریزائیڈنگ افسران کے بیانات قلم بند کر رہے ہیں، پریزائیڈنگ افسران کے بیان حلفی بھی لے رہے ہیں۔

یاد رہے کہ ہری پور میں قومی اسمبلی کے حلقہ این اے 18 میں حال ہی میں ہونے والے ضمنی الیکشن میں پی ٹی آئی رہنما عمر ایوب خان کی اہلیہ کو مسلم لیگ ن کے بابر نواز خان نے شکست دی تھی۔

پاکستان تحریک انصاف نے الزام عائد کیا تھا کہ ہری پور کے ضمنی الیکشن میں ان کا حمایت یافتہ امیدوار 25 ہزار ووٹوں سے جیتا لیکن فارم 47 میں اسے ہرا دیا گیا۔