اسلام آباد(روشن پاکستان  نیوز) قومی کرکٹ ٹیم کے فاسٹ بائولر شاہین شاہ آفریدی نے کہا ہے کہ فائنل میں بھارت ہو یا کوئی اور ٹیم  یقینی طور پر ہم ہی جیتیں گے۔

شاہین آفریدی نے پریس کانفرنس کرتے ہوئے کہا کہ ہم پہلے سے ہی جارحانہ کرکٹ کھیلتے ہیں، کرکٹ ایسے ہی کھیلی جاتی ہے ، پاکستانی فاسٹ بائولرز جارحانہ مزاج ہیں مجھے ان کا جارحانہ مزاج پسند ہے۔

ان کا مزید کہنا تھا کہ ابھی فائنل تک نہیں پہنچے جب فائنل میں پہنچیں گے تب دیکھیں گے، ہم یہاں ایشیا کپ جیتنے آئے ہیں، جو بھی ٹیم سامنے ہو گی فائنل میں اسے شکست دیں گے۔

مزید پڑھیں: ویرات کوہلی یا ہاشم آملہ، شاہین آفریدی نے مشکل ترین بیٹر کا نام بتا دیا

فاسٹ بائولر نے کہا کہ  دبئی میں فاسٹ بائولرز کو اتنی سوئنگ نہیں ملتی لیکن مجھے نہیں لگتا کہ ہماری ٹیم کے فاسٹ بائولرز کو کوئی مشکل پیش آ رہی ہے، کسی دن پچ ایسی ملتی ہے جس پر بیٹرز کو زیادہ فائدہ ہوتا ہے ، میرا کام ٹیم کا مورال بلند رکھنا اور کرکٹ کھیلنا ہے۔