اسلام آباد(روشن پاکستان نیوز) روسی فیڈریشن کے سفارتخانے اسلام آباد میں ایک باوقار تقریب کے دوران، پاکستان میں روس کے سفیر، البرٹ پی۔ خوریف نے پاکستان  پیپلزپارٹی کی ممتاز رہنما اور رکن قومی اسمبلی سحر کامران کو پاک-روس تعلقات میں ان کی شاندار خدمات کے اعتراف میں یادگاری شیلڈ پیش کی۔

اس سے پہلے سحر کامران کو روسی فیڈریشن کی جانب سے “ایوارڈ آف کوآپریشن” سے بھی نوازا گیا، جو انہیں وزارتِ خارجہ روس نے 31 اگست 2018 کو دونوں ممالک کے درمیان دوستانہ تعلقات کو فروغ دینے کے لیے دی گئی ان کی کاوشوں کے اعتراف میں عطا کیا تھا۔

سحر کامران اس وقت 2024 سے 2029 کے لیے قومی اسمبلی کی منتخب رکن ہیں۔ وہ 2012 سے 2018 تک سینیٹ آف پاکستان کی رکن بھی رہ چکی ہیں۔ تعلیم، فلاحی کام، اور بین الاقوامی امور میں ان کی گرانقدر خدمات کے باعث انہیں حکومتِ پاکستان کی جانب سے “تمغۂ امتیاز” جیسے اعلیٰ سول اعزاز سے بھی نوازا جا چکا ہے۔

پاکستان پیپلز پارٹی کی سینئر رہنما سحر کامران نے اپنے سیاسی کیریئر کا آغاز 1984 میں پیپلز اسٹوڈنٹس فیڈریشن سے کیا۔ وہ نہ صرف سینٹ میں خدمات انجام دے چکی ہیں بلکہ 2018 سے 2022 تک پیپلز پارٹی کے ریسرچ، کمیونیکیشن اور سوشل میڈیا سیل کی مرکزی کوآرڈینیٹر بھی رہی ہیں۔

کامران اس وقت مرکز برائے پاکستان اینڈ گلف اسٹڈیز (CPGS) کی سرپرست اعلیٰ کی حیثیت سے بھی ذمہ داریاں نبھا رہی ہیں۔ ان کا علمی و تحقیقی سفر بھی نمایاں ہے۔ ان کی تحریریں اور تحقیقی مضامین ملکی و غیر ملکی جرائد و اخبارات میں شائع ہوتے رہتے ہیں۔

انہوں نے “ری جویونیٹنگ فاٹا”، “پاکستان اور خلیجی ریاستوں کے تعلقات”، “پاک-سعودی تعلقات”، اور “پاکستان اور روس تعلقات: ایک جائزہ” جیسے موضوعات پر قابلِ قدر کام کیا ہے۔ ان کی تصنیف “شاہ عبداللہ بن عبدالعزیز کی دانش و فراست” کو بھی علمی حلقوں میں سراہا گیا۔

روس کے ساتھ ان کے قریبی روابط کا مظاہرہ سوشی فورم، شنگھائی تعاون تنظیم و BRICS خواتین کانگریس، یوریشین ویمن فورم (سینٹ پیٹرزبرگ)، ماسکو نیوکلیئر کانفرنس، اور قازان فورم جیسے عالمی پلیٹ فارمز پر ان کی شرکت اور کلیدی تقاریر سے بھی ہوتا ہے۔

سحر کامران کی خدمات نے نہ صرف پاک-روس تعلقات کو نئی جہت دی بلکہ پاکستان کا مثبت اور ترقی پسند تشخص بھی عالمی سطح پر اجاگر کیا۔

مزید پڑھیں: سینیٹر تاج حیدر کی وفات پر سحر کامران کی تعزیت