دبئی(روشن پاکستان نیوز) متحدہ عرب امارات کے شہر دبئی میں دنیا کی پہلی ایسی سڑک کی تعمیر شروع کر دی گئی ہے جسے سونے کے عناصر کے ساتھ تیار کیا جا رہا ہے۔
عرب میڈیا رپورٹس کے مطابق اس منصوبے کے تحت تعمیر کی جانے والی گولڈ اسٹریٹ دبئی کو سونے اور زیورات کے کاروبار میں ایک نمایاں اور منفرد عالمی مرکز کے طور پر مزید مستحکم بنانے میں اہم کردار ادا کرے گی۔
دبئی کے گولڈ ڈسٹرکٹ میں قائم کی جانے والی اس سڑک کو خصوصی طرزِ تعمیر کے تحت ڈیزائن کیا جا رہا ہے، جس میں سونے کی جھلک اور جمالیاتی عناصر شامل ہوں گے، تاکہ دنیا بھر سے آنے والے سیاحوں اور خریداروں کے لیے اسے ایک دلکش اور یادگار مقام بنایا جا سکے۔
اس منصوبے کا مقصد محض آرائش یا خوبصورتی تک محدود نہیں، بلکہ دبئی کو سونے، چاندی اور قیمتی زیورات کی عالمی تجارت کے نقشے پر ایک جدید اور منفرد حیثیت دلانا بھی ہے۔
دبئی پولیس کی عوام کو جعلی ورک ویزا اسکیموں اور ویزا فراڈ سے ہوشیار رہنے کی ہدایت
گولڈ ڈسٹرکٹ کو ایک جامع گولڈ ہب کے طور پر ترقی دی جا رہی ہے، جہاں ریٹیل، ہول سیل، سرمایہ کاری اور زیورات سے متعلق مکمل ویلیو چین ایک ہی مقام پر دستیاب ہوگی۔ منصوبے کے تحت عالمی شہرت یافتہ برانڈز سمیت ایک ہزار سے زائد ریٹیلرز اپنی خدمات فراہم کریں گے۔
یہ گولڈ ڈسٹرکٹ نہ صرف سونے اور زیورات کے کاروبار کا ایک بڑا مرکز بننے کی صلاحیت رکھتا ہے بلکہ بین الاقوامی سیاحوں، خریداروں اور سرمایہ کاروں کے لیے بھی ایک اہم سیاحتی کشش کے طور پر ابھرنے کی توقع ہے۔
