نیویارک(روشن پاکستان نیوز) ڈیموکریٹک سوشلسٹ اور نیویارک کے نومنتخب میئر زہران ممدانی سابق پاکستانی کرکٹر اور کمنٹیٹر رمیز راجہ کے مداح نکلے۔

34 سالہ ممدانی منگل کے روز نیویارک سٹی کے میئر منتخب ہوئے جس کے بعد مختلف سوشل میڈیا پلیٹ فارمز پر نیویارک سٹی کے نومنتخب میئر کی الیکشن مہم کی ایک ویڈیو وائرل ہو رہی ہے جسے اب رمیز راجہ نے بھی ری شیئر کیا ہے۔

وائرل ویڈیو میں زہران ممدانی کو اپنی ٹیم سے خطاب کرتے دیکھا جا سکتا ہے، انہوں نے اپنے ساتھیوں کا جوش بڑھانے کے لیے رمیز راجہ کا حوالہ دیا اور ان کی لائنز (To snatch defeat from the jaws of victory) دہرائیں۔

مزید پڑھیں: امریکہ میں صدر ٹرمپ کیخلاف ہر ریاست میں بڑے پیمانے پر مظاہرے

رمیز راجہ نے نیویارک سٹی کے نومنتخب میئر کی الیکشن مہم کی مذکورہ ویڈیو مائیکرو بلاگنگ ویب سائٹ ایکس پر ری شیئر کی اور انہیں مبارکباد دیتے ہوئے کہا کہ بہت بہت مبارک ہو مسٹر ممدانی اور کمنٹری کے شوقین ہونے کا شکریہ۔

رمیز راجہ نے کہا کہ آپ نے سیدھے بلے سے کھیل کر ان لوگوں کو بے نقاب کیا جو کرکٹ نہیں کھیلتے، آپ پر بہت فخر ہے۔