مکہ مکرمہ(روشن پاکستان نیوز)سعودی حکومت نے مسجد الحرام میں پانی کے کین اور بیگ لے جانے پر پابندی عائد کردی ہے۔ مسجد الحرام کے دروازوں کے نگران سیف السلمی کہتے ہیں مسجد الحرام میں عبادت کے لیے آنے والوں کو متعلقہ قواعد و ضوابط کا خیال رکھنا چاہیے تاکہ کسی کو پریشانی کا سامنا نہ کرنا پڑے۔
السلمی نے سعودی ٹی وی سے گفتگو میں کہا کہ مسجد الحرام کی انتظامیہ موتمرین کو ہر ممکن سہولت فراہم کرتی ہے۔
السلمی نے بتایا کہ تمام اہلکاروں کو ہدایت کردی گئی ہے کہ پانی کے کین یا بڑے بیگز کے ساتھ کسی کو مسجد الحرام کی حدود میں داخل نہ ہونے دیں۔
یہ پابندی پہلے بھی عائد تھی تاہم بعد میں نرمی برتے جانے پر لوگوں نے سامان لانا شروع کردیا۔ اس کے نتیجے میں دوسروں کو شدید مشکلات کا سامنا کرنا پڑتا ہے۔
بہت سے لوگ ذاتی سامان راہداریوں میں بھی رکھ دیتے ہیں جس کے نتیجے میں گزرنے والوں کو مشکلات پیش آتی ہیں۔
