انقرہ(روشن پاکستان نیوز) ترکیہ کے فٹبال شائقین کا طویل انتظار ختم ہو گیا۔ کیونکہ قومی ٹیم نے 24 سال بعد فیفا ورلڈ کپ کے لیے کوالیفائی کر لیا۔
ترکیہ نے پلے آف فائنل میں کوسوو کے خلاف سنسنی خیز مقابلے میں 1-0 سے کامیابی حاصل کر کے عالمی کپ میں جگہ بنائی۔ ترکیہ آخری بار 2002 کے ورلڈ کپ میں شریک ہوا تھا۔ جہاں اس نے تیسری پوزیشن حاصل کر کے شاندار کارکردگی دکھائی تھی۔
اس تاریخی کامیابی پر ترکیہ بھر میں شائقین نے جشن منایا اور ٹیم کی کارکردگی کو بھرپور سراہا جا رہا ہے۔ عالمی فٹبال حلقوں میں بھی ترکیہ کی واپسی کو ایک اہم پیشرفت قرار دیا جا رہا ہے۔
ایران کا امریکا میں ہونیوالے فٹبال ورلڈکپ میں شرکت نہ کرنے کا اعلان
اس سے قبل عراق نے بھی 40 سال بعد ورلڈ کپ کے لیے کوالیفائی کر کے تاریخ رقم کر دی۔ عراق نے انٹر کنفیڈریشن پلے آف میں بولیویا کو 2-1 سے شکست دے کر ٹورنامنٹ میں جگہ حاصل کی۔
عراق اس سے قبل صرف ایک بار 1986 میں میکسیکو میں ہونے والے ورلڈ کپ میں شریک ہوا تھا۔ جہاں اسے گروپ مرحلے میں تمام میچز میں شکست کا سامنا کرنا پڑا تھا۔ اس بار ٹیم کی کوالیفکیشن کو عراقی فٹبال کے لیے ایک نئے دور کا آغاز قرار دیا جا رہا ہے۔
