اسلام آباد(روشن پاکستان نیوز) راولپنڈی/اسلام آباد یونین آف جرنلسٹس (آر آئی یو جے) کے سالانہ انتخابات 2026 کے نتائج کا اعلان کر دیا گیا ہے، جس کے مطابق تمام عہدیداران بلا مقابلہ منتخب ہوئے۔
انتخابی نتائج کے مطابق آصف بشیر چوہدری کو آر آئی یو جے کا صدر منتخب کر لیا گیا ہے، جبکہ توصیف عباسی اور رشید ملک کو نائب صدور منتخب کیا گیا۔ بشیر عثمانی کو جنرل سیکریٹری اور اظہار خان نیازی کو فنانس سیکریٹری منتخب کیا گیا ہے۔
اسی طرح راجہ عمران جنجوعہ اور رانا فرحان اسلم کو جوائنٹ سیکریٹریز منتخب کیا گیا۔
ایگزیکٹو کونسل کے اراکین میں عائشہ ناز، علی اختر اور نوابزادہ شاہ علی منتخب ہوئے، جبکہ شہزاد راجپوت، حمید عباسی اور اسد شرر بھی ایگزیکٹو کونسل کا حصہ ہوں گے۔ اس کے علاوہ غفران چشتی، نور ایمن زہرا، اعجاز احمد فکری اور دوست محمد کو بھی ایگزیکٹو کونسل میں شامل کیا گیا ہے۔
نومنتخب عہدیداران نے اس عزم کا اظہار کیا کہ وہ صحافی برادری کے مسائل کے حل، آزادیٔ صحافت کے تحفظ اور صحافیوں کے حقوق کے لیے بھرپور جدوجہد جاری رکھیں گے۔ صحافتی تنظیموں اور سینئر صحافیوں نے نومنتخب قیادت کو مبارکباد دیتے ہوئے نیک خواہشات کا اظہار کیا ہے۔
