کوئٹہ(روشن پاکستان نیوز) بلوچستان کے پارلیمانی سیکریٹری برائے اقلیتی امور سنجے کمار سے مسلح افراد نے ڈکیتی کر کے موبائل فون اور نقدی چھین لی اور موقع سے فرار ہو گئے۔
واقعے کے حوالے سے سنجے کمار نے بتایا کہ حملہ آوروں کی تعداد تقریباً 15 کے قریب تھی، جنہوں نے اچانک انہیں گھیر کر واردات کی۔
پارلیمانی سیکریٹری کے مطابق ملزمان اسلحے سے لیس تھے اور مختصر وقت میں ڈکیتی کرکے فرار ہونے میں کامیاب ہو گئے۔ خوش قسمتی سے واقعے میں کوئی جانی نقصان نہیں ہوا، تاہم واقعے کے بعد علاقے میں خوف و ہراس پھیل گیا۔
پولیس نے اطلاع ملتے ہی موقع پر پہنچ کر شواہد اکٹھے کیے اور ملزمان کی تلاش شروع کر دی ہے، حکام کا کہنا ہے کہ واقعے کی مکمل تحقیقات کی جا رہی ہیں اور جلد ملزمان کو گرفتار کر لیا جائے گا۔
پولیس نے علاقے میں ناکہ بندی بھی کر دی ہے تاکہ ملزمان کی گرفتاری ممکن بنائی جا سکے۔
