اسلام آباد(روشن پاکستان نیوز) مسلم لیگ (ن) کے سینئر رہنما اور نواز شریف کے قریبی ساتھی سینیٹر عرفان صدیقی انتقال کرگئے۔
عرفان صدیقی دو ہفتے سے سانس کی تکلیف کے باعث علیل تھے اور اسلام آباد کے نجی ہسپتال میں ان کا علاج ہو رہا تھا، عرفان صدیقی سینیٹ میں مسلم لیگ ن کے پارلیمانی لیڈر تھے۔
ان کی نماز جنازہ آج سہ پہر 4 بجے ادا کی جائے گی، تدفین ایچ الیون قبرستان اسلام آباد میں کی جائے گی۔
سینیٹر عرفان صدیقی irfan siddiqui مارچ 2021 میں سینیٹ کے رکن منتخب ہوئے تھے، وہ سینیٹ کی خارجہ امور کمیٹی کے چیئرمین بھی تھے۔
ان کے انتقال پر پاکستان مسلم لیگ (ن) کے صدر اور سابق وزیراعظم محمد نوازشریف نے اُن کے اہل خانہ سے دلی ہمدردی کا اظہار کیا ہے، انہوں نے کہا کہ اپنے انتہائی مخلص، با اعتماد اور وفا شعار بھائی عرفان صدیقی کی وفات بڑا دکھ ہے۔
مزید پڑھیں: بھارتی میڈیا پر بالی وڈ لیجنڈ اداکار دھرمیندر کے انتقال کی خبریں، بیٹی نے تردید کردی
نواز شریف نے کہا کہ عرفان صدیقی کا قلم اصول اور حریت فکر کی دلیل بنا رہا، عرفان صدیقی سے محبت کا رشتہ تھا، اپنا غم الفاظ میں بیان کرنا ممکن نہیں، وہ ایک منفرد لکھاری، عاجز مزاج اور روشن دماغ شخصیت تھے۔
سابق وزیراعظم نے کہا کہ اُن کی وفات ایک عزیز ترین بھائی کا بچھڑ جانا ہے جس کی کمی پوری نہیں ہوسکتی، اللہ تعالی مرحوم کو جنت الفردوس میں اعلیٰ ترین مقام دیں اور اہل خانہ کو صبر دیں۔
