راولپنڈی(روشن پاکستان نیوز) انسداد دہشتگردی عدالت نے بانی پاکستان تحریک انصاف (پی ٹی آئی) عمران خان کی ہمشیرہ علیمہ خان کے 7ویں مرتبہ ناقابل ضمانت وارنٹ گرفتاری جاری کر دیئے۔
راولپنڈی کی انسداد دہشتگردی عدالت نے پی ٹی آئی رہنما علیمہ خان سمیت 11 ملزمان کے خلاف 26 نومبر کیس کی سماعت کی۔ علیمہ خان اور ان کے وکلا آج بھی عدالت میں پیش نہیں ہوئے۔
عدالت نے علیمہ خان کی عدم حاضری پر ان کے ساتویں مرتبہ ناقابل ضمانت وارنٹ جاری کیے۔ جبکہ ان کے بینک اکاؤنٹ منجمد کرنے سے متعلق رپورٹ بھی عدالت میں پیش کر دی گئی۔
رپورٹ کے مطابق متعلقہ بینکوں میں علیمہ خان کے نام سے نمل یونیورسٹی سمیت فلاحی اداروں کے اکاؤنٹس ہیں۔ اور جن بینکوں نے رپورٹ جمع نہیں کرائی عدالت نے ان کو نوٹس جاری کر دیا۔
بعد ازاں عدالت نے ساتویں مرتبہ علیمہ خان کے وارنٹ گرفتاری جاری کرتے ہوئے مقدمے کی سماعت 6 نومبر تک ملتوی کر دی۔
یہ بھی پڑھیں:علیمہ خان کا پاسپورٹ اور شناختی کارڈ بلاک
واضح رہے کہ علیمہ خان سمیت 11 ملزمان کے خلاف تھانہ صادق آباد میں مقدمہ درج ہے۔
