اسلام آباد(روشن پاکستان نیوز) کوہستان کرپشن اسکینڈل میں مزید 20 کروڑ روپے برآمد کرلئے گئے ہیں۔
نیب ذرائع کے مطابق ایبٹ آباد میں چھاپے کے دوران مرکزی ملزم کے گھر سے 10 کروڑ روپے برآمد ہوئے، مرکزی ملزم کے ساتھی کے گھر سے بھی 10 کروڑ روپے برآمد کئے گئے۔
رقم کی نشاندہی مرکزی ملزم کی زیر حراست اہلیہ نے کی،40 ارب مالیاتی اسکینڈل میں مجموعی ریکوری 2 ارب روپے سے زائد کی ہوچکی ہے۔
یاد رہے نیب نے 2 روز قبل ہی کوہستان کرپشن اسکینڈل کے مرکزی ملزم کے ساتھی بلال شاہ کے گھر سے 115 تولے سونا بھی برآمد کیا تھا۔
نیب ذرائع نے بتایا کہ ملزم کا ایبٹ آباد میں 6 کروڑ مالیت کا ایک پلاٹ بھی ہے، اسکینڈل میں پولیس سب انسپکٹر نصیرالدین کو بھی گرفتار کیا گیا ہے۔
مزید پڑھیں: کرپشن اور اختیارات کے ناجائز استعمال پر 17 سرکاری اہلکار گرفتار
ذرائع کے مطابق ملزم کے اکاؤنٹس میں ساڑھے تین کروڑ کی ٹرانزیکشن کی گئی ہے، ملزم کے اکاؤنٹ میں مرکزی ملزم قیصر اقبال نے رقم منتقل کی ہے۔
نیب نے مرکزی ملزم قیصر اقبال کا ایک قیمتی بنگلہ بھی ضبط کیا ہے ، بنگلے کی مالیت تقریباً 6 کروڑ روپے ہے، ملزم نے بنگلہ اپنے بھائی کے نام پر خریدا تھا۔
