اسلام آباد(روشن پاکستان نیوز) گزشتہ روز بلوچستان کے مختلف علاقوں میں شہریوں نے فجر کے وقت آسمان پر رنگ برنگی روشنیوں کا حسین ہالہ دیکھا، جس نے دیکھنے والوں کو حیرت اور تجسس میں مبتلا کر دیا۔ اس خوبصورت منظر کی تصاویر سوشل میڈیا پر تیزی سے وائرل ہوئیں، جہاں کئی صارفین نے قیاس آرائیاں شروع کر دیں کہ شاید پاکستان نے کوئی ہائیپر سونک میزائل تجربہ کیا ہو۔

عینی شاہدین کے مطابق یہ منظر کوئٹہ، ہرنائی اور اطراف کے علاقوں میں فجر سے کچھ پہلے دیکھا گیا۔ شہریوں نے بتایا کہ آسمان پر چمکتی ہوئی گھومتی ہوئی لکیریں اور بادلوں جیسے نمونے بنے ہوئے تھے، جو آہستہ آہستہ رنگ بدل رہے تھے۔

سوشل میڈیا پر مختلف اکاؤنٹس نے اس مظہر کو فوجی تجربے یا کسی نئی ٹیکنالوجی سے منسلک قرار دیا، جبکہ بعض نے اسے غیر معمولی خلائی سرگرمی بھی کہا۔

تاہم بعد ازاں محکمہ موسمیات پاکستان (PMD) نے وضاحت جاری کرتے ہوئے بتایا کہ یہ منظر کسی میزائل تجربے کا نہیں بلکہ ایک نایاب قدرتی مظہر لینٹی کیولر کلاؤڈ فارمیشن (Lenticular Cloud Formation) کا نتیجہ تھا۔

محکمہ موسمیات کے مطابق یہ عدسہ نما بادل صبح کے وقت کوہِ مردار جو کوئٹہ کے مشرقی پہاڑی سلسلے میں واقع ہے کے اوپر بنے، تقریباً 20 منٹ تک موجود رہے اور سورج نکلنے سے کچھ دیر پہلے غائب ہو گئے۔

ماہرین کے مطابق لینٹی کیولر بادل اُس وقت بنتے ہیں جب مستحکم ہوا پہاڑوں کے اوپر سے گزر کر لہر دار شکل اختیار کر لیتی ہے۔ یہ بادل عام طور پر پہاڑی علاقوں کے مخالف سمت میں بنتے ہیں اور دیکھنے میں کسی اڑن طشتری (UFO) یا سائنس فکشن فلموں کے مناظر سے مشابہ ہوتے ہیں۔

مزید پڑھیں: وزیر مملکت خزانہ و ریلوے سے جرمن سفیر کی ملاقات، دوطرفہ تعلقات اور اقتصادی تعاون پر تبادلہ خیال

برطانوی محکمہ موسمیات کے مطابق ایسے بادل دنیا بھر میں یو ایف اوز کے مشاہدات کے پیچھے سب سے عام سائنسی وضاحت تصور کیے جاتے ہیں۔

محکمہ موسمیات کی وضاحت کے بعد اگرچہ افواہیں دم توڑ گئیں، مگر بلوچستان کے آسمان پر یہ دلفریب مظہر شہریوں کے لیے ایک یادگار لمحہ بن گیا، جسے انہوں نے قدرت کا انوکھا کرشمہ قرار دیا۔