اسلام آباد (عرفان حیدر) اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف بڑی کارروائیاں کرتے ہوئے 6 ملزمان کو گرفتار کر لیا۔ کارروائیوں کے دوران 94 لاکھ روپے سے زائد مالیت کی 67.71 کلوگرام منشیات برآمد کی گئی۔
تفصیلات کے مطابق اے این ایف نے 5 مختلف کارروائیاں کیں۔ علامہ اقبال انٹرنیشنل ایئرپورٹ لاہور کے کارگو شیڈ میں امریکہ سے آنے والے پارسل میں کھلونوں سے 2 کلوگرام ویڈ برآمد کی گئی۔
راوی ٹول پلازہ لاہور کے قریب ایک ٹرک سے 8 کلوگرام آئس اور 1 کلوگرام ہیروئن برآمد ہوئی، جبکہ موقع پر 3 ملزمان کو گرفتار کر لیا گیا۔
کراچی میں الآصف اسکوائر کے قریب موٹر سائیکل سوار 3 ملزمان کے قبضے سے 6 کلوگرام چرس برآمد ہوئی۔
مزید پڑھیں: اے این ایف کا ملک بھر میں منشیات اسمگلنگ کے خلاف بڑا کریک ڈاؤن
پشاور کے حاجی کیمپ بس ٹرمینل پر واقع کوریئر آفس میں فیصل آباد بھیجے جانے والے پارسل سے گاڑی کے پرزوں میں چھپائی گئی 710 گرام چرس برآمد کی گئی۔
بلوچستان کے علاقے پسنی، ضلع گوادر کی کوپر کوسٹل لائن سے 50 کلوگرام چرس برآمد کی گئی۔
اے این ایف ترجمان کے مطابق تمام کارروائیوں میں ملزمان کے خلاف انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔
