اسلام آباد (روشن پاکستان نیوز) وزیراعظم یوتھ پروگرام (PMYP) کے چیئرمین نے جناب شہریار میمن کو اوورسیز امور اور بزنس و ٹریڈ لنکیجز کے لیے فوکل پرسن مقرر کر دیا ہے۔ اس اہم تقرری کا مقصد حکومتِ پاکستان کی اس پالیسی کو تقویت دینا ہے جس کے تحت بیرونِ ملک مقیم پاکستانیوں سے روابط مضبوط کیے جائیں، تجارتی مواقع کو فروغ دیا جائے، اور نوجوانوں کو قومی ترقی کا حصہ بنایا جائے۔
اپنے تقرری کے بعد جاری کردہ بیان میں شہریار میمن نے چیئرمین یوتھ پروگرام اور حکومتِ پاکستان کا شکریہ ادا کرتے ہوئے کہا کہ وہ اپنی ذمہ داریاں پوری ایمانداری اور لگن کے ساتھ انجام دیں گے۔
انہوں نے کہا کہ:
“پاکستان کے نوجوان ایک بے مثال قومی اثاثہ ہیں۔ اگر ہم بیرون ملک پاکستانیوں سے تعلقات کو مضبوط کریں، تجارت کو فروغ دیں، اور نوجوان ٹیلنٹ کو عالمی مارکیٹ سے جوڑیں، تو ہم خوشحال اور خود کفیل پاکستان کے وژن کو حقیقت میں بدل سکتے ہیں۔”
شہریار میمن کا کہنا تھا کہ پاکستان کی 60 فیصد سے زائد آبادی نوجوانوں پر مشتمل ہے، جو ملک کی پائیدار ترقی اور روشن مستقبل کی ضمانت ہیں۔
بطور فوکل پرسن، وہ نہ صرف حکومتی اداروں، چیئرمین یوتھ پروگرام، اور عالمی شراکت داروں کے ساتھ قریبی روابط قائم کریں گے بلکہ پاکستان کی تجارتی صلاحیت کو عالمی سطح پر اجاگر کرنے اور نوجوانوں کو بااختیار بنانے کے لیے بھی بھرپور اقدامات کریں گے۔
یہ تقرری وزیراعظم یوتھ پروگرام کی جانب سے نوجوان قیادت کو بااختیار بنانے اور پاکستان کو بین الاقوامی سطح پر ایک مؤثر اقتصادی اور تجارتی شراکت دار کے طور پر پیش کرنے کی عملی کاوش ہے۔
