کراچی(روشن پاکستان نیوز) پاکستان پیپلز پارٹی کی سینئر رہنما این اے سحر کامران نے شہید ذوالفقار علی بھٹو کی چھیالیسویں برسی کے موقع پر ایک پیغام جاری کیا، جس میں انہوں نے قائد جمہوریت شہید ذوالفقار علی بھٹو کو خراجِ عقیدت پیش کیا۔ سحر کامران نے کہا کہ شہید بھٹو نے ایک حقیقی عوامی جماعت تشکیل دی اور ملکی سیاست میں طاقتوروں کے چنگل سے عوام کی طاقت کو واپس لوٹایا۔
سحر کامران نے مزید کہا کہ شہید ذوالفقار علی بھٹو جیسا زیرک سیاستدان پاکستان کو دوبارہ نصیب نہیں ہوا۔ انہوں نے اس بات کا ذکر کیا کہ 46 سال قبل آج ہی کے دن شہید ذوالفقار علی بھٹو کو جھوٹے مقدمے میں پھانسی دی گئی تھی، تاہم ان کی خدمات اور کارنامے آج بھی زندہ ہیں۔
سحر کامران نے شہید بھٹو کے مختلف کارناموں کا ذکر کرتے ہوئے کہا کہ انہوں نے پاکستان کے ایٹمی پروگرام کی بنیاد رکھی، ملک کو متفقہ آئین دیا اور پیپلز پارٹی کی بنیاد رکھی جو آج بھی پاکستان کی مقبول ترین جماعت ہے۔ وہ ملک کے پہلے منتخب وزیراعظم کے طور پر بھی خدمات سرانجام دے چکے ہیں۔
انہوں نے کہا کہ شہید ذوالفقار علی بھٹو مغربی غلبے کے خلاف اسلامی ممالک کو متحد کرنے میں کامیاب ہوئے، جس کی بدولت ان کا نام آج بھی دنیا میں زندہ ہے۔ سحر کامران نے اس بات کا بھی ذکر کیا کہ شہید محترمہ بینظیر بھٹو ان کی شخصیت اور خوبیوں کی پرچھائی تھیں اور بلاول بھٹو زرداری اپنی والدہ اور نانا جیسی خوبیوں کے حامل ہیں۔
مزید پڑھیں: پیپلز پارٹی کی سینئر رہنما سحر کامران کی صدر آصف علی زرداری کی صحت یابی کیلئے دعا
آخر میں سحر کامران نے دعا کی کہ اللہ تعالیٰ شہید ذوالفقار علی بھٹو اور شہید محترمہ بے نظیر بھٹو کے درجات بلند فرمائے اور ملک میں جمہوری تسلسل کے لیے ہم ان کی تقلید کر رہے ہیں۔
