لاہور(روشن پاکستان نیوز) وزیر اعلیٰ پنجاب مریم نواز نے حکم دیتے ہوئے کہا ہے کہ صوبہ بھر میں ورکرز کو کم از کم 37 ہزار ماہانہ ادائیگی یقینی بنائی جائے۔
مریم نواز کی زیر صدارت خصوصی اجلاس میں مزدوروں کی فلاح و بہبود کیلئے اہم فیصلے کیے گئے ، وزیراعلیٰ نے پنجاب بھر میں لیبر کالونیاں بنانے کیلئے پلان طلب کر لیا اور سوشل سکیورٹی اسپتالوں کی ری ویمپنگ کا بھی حکم دے دیا۔
لاہوراور راولپنڈی ،اسلام آباد میں پری سکیننگ کیلئے مریم نوازشریف ویلنس سینٹر بنیں گے ،مریم نوازویلنس سینٹر میں مریضوں کو سکریننگ کے بعد بڑے ہسپتال میں ریفرکیا جائے گا۔
اجلاس میں لاہورڈیفنس روڈ پر 200 بیڈز کے رحمت اللعالمین کارڈیالوجی سینٹر بنانے کا اصولی فیصلہ ہوا جبکہ رحیم یار خان میں 50 بیڈز کے نئے سوشل سکیورٹی اسپتال کی اصولی منظوری دی گئی۔
اس کے علاوہ وزیراعلیٰ نے مزدوروں کی فلاح وبہبود کیلئے لیبرلاز میں ترامیم کی بھی ہدایت کی۔ اجلاس سے خطاب کرتے ہوئے مریم نواز کا کہنا تھا کہ محنت کش اللہ کے دوست ہیں،اللہ کے دوستوں کو ناراض نہیں کر سکتے، پنجاب کو مزدوروں کی فلاح وبہبود کے حوالے سے مثالی صوبہ بنانے کا عزم رکھتے ہیں۔
مزید پڑھیں: شکر کرو میں نے تمہیں ہتھکڑی نہیں لگوا دی/ مریم نواز قدم بڑھاؤ ہم تمہارے ساتھ ہیں
وزیر اعلیٰ نے مزید کہا کہ مزدور کی اجرت،علاج معالجہ،بہترروزگار اوراپنی چھت کی فراہمی حکومت کی ذمہ داری ہے، کوئی مزدوربھوکا نہ سوئے،کسی کو دکھ اورپریشانی نہ ہو، مزدوروں کے بچوں کیلئے اعلیٰ تعلیم کے بہتر مواقع مہیا کر رہے ہیں۔
