بدھ,  19 جون 2024ء
پاکستانی انتخابات پر برطانیہ، امریکا اور یورپی یونین نے اپنی تشویش سے آگاہ کردیا

لندن،واشنگٹن،برسلز(روشن پاکستان نیوز)پاکستان کے انتخابات پر برطانیہ، امریکا اور یورپی یونین کی جانب سے تقریبا ایک جیسے ردعمل کا اظہار کیا گیا ہے۔

برطانیہ، امریکہ اور یورپی یونین، تینوں نے اپنے ردعمل میں مشکلات کے باوجود اپنا حق رائے دہی استعمال کرنے پر پاکستانی عوام کی تعریف، خواتین ووٹروں کی تعداد میں اضافے کو خوش آئند قرار دیا۔

اس کے ساتھ ہی انتخابی عمل کی غیر شفافیت پر اٹھنے والے سوالات پر بھی گہری تشویش کا اظہار کیا گیا۔

تینوں نے لیول پلیئنگ فیلڈ نہ ہونے پر افسوس کا اظہار کرتے ہوئے کہا کہ بعض سیاسی عناصر کو الیکشن میں حصہ نہیں لینے دیا گیا، انہیں جمع ہونے کی آزادی سے محروم رکھا گیا۔

عام انتخابات: پی ٹی آئی حمایت یافتہ آزاد امیدوار 99، ن لیگ 71اور پی پی قومی اسمبلی کی 53 نشستوں پرکامیاب

اپنے ردعمل میں تینوں نے آزادی اظہار پر پابندی پر افسوس ظاہر کرتے ہوئے کہا کہ اظہارِ رائے کی آن لائن اور آف لائن آزادی نہیں دی گئی، الیکشن کے روز انٹرنیٹ پر پابندی رہی، الیکشن کے عمل میں دخل اندازی اور سیاسی گرفتاریاں ہوئیں، اس پر بھی شدید افسوس ہے۔

اپنے ردعمل میں برطانوی وزیر خارجہ ڈیوڈ کیمرون کا کہنا تھا کہ پاکستان کی ترقی اور ملک میں اہم اصلاحات کیلئے بااختیار سویلین حکومت کا انتخاب ضروری ہے۔

امریکی وزارتِ خارجہ کے ترجمان میتھیو ملر کا کہنا تھا کہ انتخابی دھاندلی اور دخل اندازی کے الزامات کی مکمل تحقیقات ہونی چاہیے۔

یورپی یونین نے بھی یہی مطالبہ کیا اور یورپی مبصرین کی مجوزہ انتخابی سفارشات پر عمل درآمد پر زور دیا۔

یورپی یونین کا کہنا تھا کہ الیکشن سے پہلے پاکستان کو انسداد دہشتگردی کے چیلنج کا سامنا رہا تاہم اب پاکستان کو چاہیے کہ وہ جی ایس پی پلس کی رپورٹ میں بتائی گئی خامیوں کو دور کرنے کیلئے درکار معاشی اصلاحات پر توجہ دے۔

برطانیہ، امریکہ اور یورپی یونین نے پاکستان کی نئی حکومت کے ساتھ مل کر سکیورٹی، معیشت، انسانی حقوق اور گڈ گورننس کے فروغ پر کام کرنے کی یقین دہانی کرائی۔

مزید خبریں

FOLLOW US

Copyright © 2024 Roshan Pakistan News