مانچسٹر( ندیم طاہر سے) 23 مارچ یومِ پاکستان کے موقع پر قونصلیٹ آفس پاکستان مانچسٹر میں ایک پروقار اور شاندار تقریب کا انعقاد کیا گیا، جس میں پاکستانی کمیونٹی، سماجی و سیاسی شخصیات، اور مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔ تقریب کا آغاز تلاوتِ کلامِ پاک سے کیا گیا جس کے بعد قومی ترانہ پیش کیا گیا، جبکہ شرکاء نے بھرپور جوش و خروش کے ساتھ پاکستان اور افواجِ پاکستان سے اپنی والہانہ عقیدت اور یکجہتی کا اظہار کیا۔
تقریب کے مہمانِ خصوصی قونصل جنرل آف پاکستان مانچسٹر امتیاز فیروز گوندل تھے، جنہوں نے اپنے خطاب میں یومِ پاکستان کی تاریخی اہمیت پر روشنی ڈالتے ہوئے کہا کہ 23 مارچ 1940 برصغیر کے مسلمانوں کی تاریخ کا ایک سنگِ میل ہے، جب قائدینِ ملت نے ایک علیحدہ وطن کے قیام کے لیے عزمِ مصمم کا اظہار کیا۔ انہوں نے کہا کہ یہ دن ہمیں اتحاد، ایمان اور تنظیم کے سنہری اصولوں پر عمل پیرا ہونے اور پاکستان کی ترقی و استحکام کے لیے مشترکہ کوششیں جاری رکھنے کا درس دیتا ہے۔
تقریب سے ممبر برٹش پارلیمنٹ ڈاکٹر افضل خان نے خطاب کرتے ہوئے پاکستانی کمیونٹی کے مثبت کردار کو سراہا اور کہا کہ برطانیہ میں مقیم پاکستانی اپنی محنت، دیانت اور صلاحیتوں کے باعث معاشرے میں نمایاں مقام رکھتے ہیں۔ انہوں نے پاکستان اور برطانیہ کے درمیان مضبوط دوستانہ تعلقات کو مزید فروغ دینے کی اہمیت پر بھی زور دیا۔
وائس چیئرمین او پی سی پنجاب بیرسٹر امجد ملک نے اپنے خطاب میں کہا کہ اوورسیز پاکستانی اپنے وطن کے حقیقی سفیر ہیں اور وہ ہر مشکل گھڑی میں پاکستان کے ساتھ کھڑے رہے ہیں۔ انہوں نے کہا کہ یومِ پاکستان ہمیں اس عہد کی تجدید کا موقع فراہم کرتا ہے کہ ہم پاکستان کی سلامتی، خودمختاری اور خوشحالی کے لیے متحد ہو کر کام کریں گے۔
اس موقع پر ڈپٹی لارڈ میئر شوکت علی اور دیگر معزز مقررین نے بھی اپنے خیالات کا اظہار کیا اور یومِ پاکستان کے موقع پر پاکستانی قوم کو مبارکباد پیش کرتے ہوئے پاکستان کی ترقی، استحکام اور روشن مستقبل کے لیے نیک تمناؤں کا اظہار کیا۔ مقررین نے افواجِ پاکستان کی قربانیوں کو خراجِ تحسین پیش کیا اور ملکی سلامتی کے لیے ان کی خدمات کو سراہا۔
تقریب کے دوران شرکاء نے قومی پرچم لہرا کر پاکستان سے اپنی محبت اور وابستگی کا اظہار کیا، جبکہ اختتام پر پاکستان کی سلامتی، ترقی اور خوشحالی کے لیے خصوصی دعا بھی کی گئی۔ شرکاء نے اس عزم کا اعادہ کیا کہ وہ بیرونِ ملک رہتے ہوئے بھی پاکستان کی عزت و وقار کو بلند رکھنے اور وطنِ عزیز کے استحکام کے لیے اپنا کردار ادا کرتے رہیں گے۔
تقریب خوشگوار اور پُرجوش ماحول میں اختتام پذیر ہوئی، جس میں پاکستان سے محبت اور قومی یکجہتی کا جذبہ نمایاں طور پر محسوس کیا گیا۔
