ریاض (وقار نسیم وامق) سعودی عرب میں دورِ حاضر میں بچوں کی ذہنی صلاحیتوں کو اجاگر کرنے اور مختلف موضوعات پر ان کی تخلیقی سوچ کے حوالے سے تقریب کا انعقاد کیا گیا جس میں سفیرِ پاکستان سمیت دیگر اہم شخصیات نے شرکت کی اور طلباء کے درمیان ہونے والے مباحثوں میں بھرپور دلچسپی کا اظہار کیا۔
سعودی دارالحکومت ریاض میں انٹرنیشنل لیڈرز فورم اور انٹرنیشنل کالج فار ٹورازم اینڈ ہاسپیٹیلٹی کے باہمی اشتراک سے منعقدہ تقریب میں پاکستان، انڈونیشیا ، چین، بھارت اور سری لنکا سمیت دیگر ممالک کے طلباء نے شرکت کی۔
اس موقعہ پر طلباء نے معاشرتی زندگی کو گزارنے کے لیے مختلف مباحثوں میں شرکت کرکے اپنے خیالات کو اجاگر کیا جبکہ اپنی تقاریر کے ذریعے علم و دانش، لیڈر شپ اور کمیونیکشن کو اجاگر کیا اور کہا کہ اگر آج کی نئی نسل کو دنیا کا مقابلہ کرنا ہے تو طلباء کو اپنی تکنیکی اور تخلیقی صلاحیتوں کو ابھارنا ہوگا تاکہ وہ ایک تابناک مستقبل کی جانب بڑھ سکیں۔
اس موقع پر سفیر پاکستان احمد فاروق، موٹیویشنل سپیکر سید وقاص، حسن عمران، ڈاکٹر امین، پروفیسر چین منگ اور دیگر کا کہنا تھا کہ آج کی نسل کل کی معمار ہے اس لیے اس طرح کی تقریبات سے بچوں میں باہمی دلچسپی کے امور زیر بحث آتے ہیں اور طلباء ایک دوسرے سے سیکھتے ہیں جس سے ان کی ذہنی صحت کو تقویت ملتی ہے اور وہ مزید بہتر انداز سے آگے بڑھتے ہیں۔
