جدہ (محمد عدیل) — سعودی عرب کے شہر جدہ میں گزشتہ شب پاکستان بزنس فورم اور اسلام آباد چیمبر آف کامرس کے مابین مفاہمتی یادداشت (MoU) پر دستخط کی تقریب منعقد ہوئی۔ اس موقع پر مفاہمتی یادداشت پر اسلام آباد چیمبر آف کامرس کے صدر سردار طاہر محمود اور پاکستان بزنس فورم کے صدر عقیل آرائیں نے دستخط کیے۔ اس معاہدے کا مقصد اوورسیز پاکستانیوں کے لیے “ون ونڈو سلوشن” فراہم کرنا ہے، تاکہ ریئل اسٹیٹ یا کاروباری معاملات سے متعلق مسائل کو فوری اور مؤثر انداز میں حل کیا جا سکے۔
تقریب سے خطاب کرتے ہوئے صدر اسلام آباد چیمبر آف کامرس سردار طاہر محمود نے کہا کہ اوورسیز پاکستانی ہمارے دلوں میں بستے ہیں اور ہم انہیں ہر ممکن سہولت فراہم کرنے کے لیے پرعزم ہیں۔ انہوں نے اعلان کیا کہ اسلام آباد میں پاکستان بزنس فورم کے لیے ایک ون ونڈو پلیٹ فارم قائم کیا جائے گا، جہاں اوورسیز پاکستانیوں کے کاروباری اور سرمایہ کاری سے متعلق تمام مسائل کو ترجیحی بنیادوں پر حل کیا جائے گا۔
سردار طاہر محمود نے مزید کہا کہ پاکستان میں سرمایہ کاری کے بے شمار مواقع موجود ہیں، بالخصوص ریئل اسٹیٹ سیکٹر میں سرمایہ کاروں کے لیے محفوظ اور منافع بخش امکانات دستیاب ہیں۔ انہوں نے یقین دلایا کہ اوورسیز پاکستانیوں کی سرمایہ کاری کو مکمل طور پر محفوظ بنایا جائے گا اور چیمبر آف کامرس اپنی تمام تر صلاحیتیں ان کی خدمت میں پیش کرے گا۔ ان کا کہنا تھا کہ حکومت پاکستان کی اولین ترجیح اوورسیز پاکستانی ہیں جو نہ صرف قیمتی زرمبادلہ بھیجتے ہیں بلکہ ملک میں کاروبار اور سرمایہ کاری کے فروغ میں کلیدی کردار ادا کرتے ہیں۔
پاکستان بزنس فورم کے صدر عقیل آرائیں نے اپنے خطاب میں اسلام آباد چیمبر آف کامرس کے تعاون پر شکریہ ادا کرتے ہوئے کہا کہ اس مفاہمتی یادداشت کے ذریعے پاکستان میں سرمایہ کاری کے نئے دروازے کھلیں گے۔ ان کا کہنا تھا کہ اس معاہدے کا مقصد اوورسیز پاکستانیوں کو ایک ایسا پلیٹ فارم فراہم کرنا ہے جہاں ان کے کاروباری مسائل اور سرمایہ کاری سے متعلق رکاوٹوں کو بروقت حل کیا جا سکے۔
تقریب میں نظامت کے فرائض انجم اقبال نے انجام دیے جبکہ تقریب کا آغاز تلاوتِ قرآنِ پاک سے ہوا۔ اس موقع پر پاکستان بزنس فورم کی ایگزیکٹو باڈی کے اراکین ریاض گھمن، چوہدری امجد اور دیگر عہدیداران بھی موجود تھے۔ تقریب کے اختتام پر چوہدری ریاض گھمن نے تمام معزز مہمانوں اور شرکاء کا شکریہ ادا کیا۔
