اسلام آباد (نیوزڈیسک) پاکستان کے لیجنڈ بلے باز اور سابق کپتان بابر اعظم نے ایک اور عالمی اعزاز اپنے نام کر لیا۔

بابر اعظم نے پروفیشنل کرکٹ میں 25 ہزار رنز مکمل کر لیے۔ بابر اعظم نے آج پی ایس ایل کے میچ میں 32واں رن بنا کر یہ سنگ میل عبور کیا۔

بابر اعظم نے فرسٹ کلاس کرکٹ میں 5 ہزار 950 اور لسٹ اے میں 8 ہزار 645 رنز بنائے ہیں، بابر اعظم نے ٹی ٹوئنٹی کرکٹ میں 10 ہزار 405 رنز بنائے ہیں۔

بابر اعظم تیز ترین 10 ہزار ٹی ٹوئنٹی رنز بنانے والے بلے باز بھی ہیں، انہوں نے یہ سنگ میل 271 اننگز میں عبور کیا جب کہ کرس گیل نے 285 اننگز میں 10 ہزار ٹی ٹوئنٹی رنز بنائے۔

بابر اعظم پاکستان سپر لیگ میں 3 ہزار رنز بنانے والے واحد کھلاڑی بھی ہیں، وہ مجموعی طور پر 10 ہزار ٹی ٹوئنٹی رنز بنانے والے 13ویں کھلاڑی ہیں۔