اسلام آباد: شوگر ملوں اور ڈیلرز کی ٹیکس چوریوں کے خلاف اب تین ادارے مشترکہ طور پر کارروائیاں کریں گے، وزیر اعظم کی طرف سے ہدایات جاری ہو گئیں۔
تفصیلات کے مطابق وزیر اعظم شہباز شریف نے ایک اجلاس میں شوگر ملوں اور شوگر ڈیلرز کے حوالے سے بڑا فیصلہ کرتے ہوئے ایف بی آر، ایف آئی اے اور آئی بی کو سیلز ٹیکس چوری کرنے اور قیمتوں میں اضافہ روکنے کے لیے مشترکہ کارروائی کی ہدایت کر دی۔
وزیر اعظم شہباز شریف نے ہدایت کی کہ شوگر کرشنگ سیزن شروع ہو رہا ہے، سیکٹر میں سیلز ٹیکس چوری کے سدباب کو یقینی بنایا جائے، اور شوگر ملوں اور ڈیلرز سے جی ایس ٹی کی 100 فی صد وصولی یقینی بنائیں۔
وزیر اعظم شہباز شریف نے اجلاس میں شوگر ملوں میں کیمرے نصب کرنے کا بھی فیصلہ کیا، اور کہا کہ اس اقدام سے چینی ذخیرہ کی اندوزی کی روک تھام اور قیمتوں میں توازن رہے گا۔ انھوں نے کہا ٹیکس چوری اور ذخیرہ اندوزی پر ملز مالکان کے خلاف سخت کارروائی ہوگی۔
ان کا کہنا تھا کہ کیمروں کی مدد سے شوگر ملوں کے پیداواری عمل اور ذخیرہ اندوزی پر نظر رکھی جائے گی، اور سیلز ٹیکس کی ادائیگی بھی یقینی بنائی جائے گی۔
انھوں نے واضح کیا کہ چینی کی قیمتوں میں اضافہ کسی صورت برداشت نہیں کیا جائے گا، اور اداروں کو ہدایت کی کہ شوگر سٹہ مافیا کے خلاف سخت کارروائی کریں، اور اسٹیل، سگریٹ، سیمنٹ سمیت دیگر شعبوں میں بھی ایسے اقدامات کیے جائیں۔
