اسلام آباد(روشن پاکستان نیوز) پاکستان ٹیلی کمیونیکیشن اتھارٹی (پی ٹی اے) نے مالی سال 2024-25 کی سالانہ رپورٹ جاری کر دی، جس کے مطابق پاکستان میں ٹیلی کام صارفین کی تعداد 20 کروڑ سے تجاوز کر گئی ہے۔
پی ٹی اے کی رپورٹ میں بتایا گیا ہے کہ ملک میں براڈ بینڈ کنکشنز کی تعداد 15 کروڑ سے بڑھ چکی ہے، جبکہ ٹیلی کام شعبے کی مجموعی آمدن ایک کھرب روپے سے زیادہ ریکارڈ کی گئی۔ قومی خزانے میں ٹیلی کام سیکٹر کا حصہ 402 ارب روپے تک پہنچ گیا ہے۔
رپورٹ کے مطابق ٹیلی کام شعبے میں سرمایہ کاری کا حجم 838 ملین امریکی ڈالر تک جا پہنچا، جبکہ گزشتہ سال کے مقابلے میں آمدن میں 12 فیصد اضافہ ہوا۔ پی ٹی اے کا کہنا ہے کہ ٹیلی کام سرمایہ کاری میں 9 فیصد نمایاں ترقی دیکھنے میں آئی ہے۔
ملک کے 92 فیصد رقبے پر ٹیلی کام کوریج فراہم کی جا چکی ہے اور براڈ بینڈ پینیٹریشن 60 فیصد سے تجاوز کر گئی ہے۔
پاکستان میں 95 فیصد سیلولر نیٹ ورکس فور جی ٹیکنالوجی پر منتقل ہو چکے ہیں، جبکہ علاقائی اور عالمی رابطوں کو بہتر بنانے کے لیے 4 نئی سب میرین کیبلز شامل کی جا رہی ہیں۔
مزید پڑھیں: پاکستان میں فائیو جی لانچنگ کے حوالے سے پی ٹی اے نے بڑا قدم اٹھا لیا
پی ٹی اے رپورٹ کے مطابق انٹرنیٹ ڈیٹا کے استعمال میں ریکارڈ اضافہ ہوا ہے، جو 27,727 پیٹا بائٹس تک پہنچ گیا۔
اس کے علاوہ ملک میں 95 فیصد موبائل فونز کی مقامی سطح پر تیاری شروع ہو چکی ہے، جن میں سے 68 فیصد اسمارٹ فونز ہیں۔
رپورٹ میں یہ بھی بتایا گیا کہ سائبر سیکیورٹی کی عالمی درجہ بندی میں پاکستان کی پوزیشن مزید بہتر ہوئی ہے، جبکہ صارفین کے تحفظ سے متعلق اقدامات کے باعث شکایات میں 13 فیصد کمی ریکارڈ کی گئی۔
پی ٹی اے نے فائیو جی ٹیکنالوجی کے آغاز اور ڈیجیٹل معیشت کے فروغ کے عزم کا اعادہ بھی کیا ہے۔
