کراچی(روشن پاکستان نیوز) فیڈریشن آف پاکستان چیمبرز آف کامرس اینڈ انڈسٹری اور کراچی چیمبر آف کامرس اینڈ انڈسٹری نے 19 جولائی کو شیڈول ملک گیر شٹر ڈاؤن ہڑتال فی الحال منسوخ نہ کرنے کا واضح اعلان کر دیا ہے۔
ایف پی سی سی آئی کے سینئر نائب صدر ثاقب نثار نے کہا ہے کہ تاجر برادری سے مشاورت کا عمل جاری ہے اور آج فیصلہ کیا جائے گا کہ ہڑتال کے اگلے لائحہ عمل میں کوئی تبدیلی لانی ہے یا نہیں، تاہم اس وقت تک ہڑتال کا فیصلہ برقرار ہے۔
دوسری جانب کراچی چیمبر آف کامرس کے صدر محمد جاوید بلوانی نے بھی ہڑتال کے حوالے سے تمام افواہوں کو مسترد کرتے ہوئے کہا ہے کہ 19 جولائی بروز ہفتہ ملک گیر ہڑتال شیڈول کے مطابق ہی ہوگی۔ ہڑتال نہ ملتوی ہوگی اور نہ منسوخ ہو گی۔
جاوید بلوانی نے کہا کہ ہڑتال کے لیے پوری تیاری کے ساتھ عملدرآمد کیا جائے گا اور اس فیصلے میں چاروں صوبوں کے بڑے چیمبرز سے مشاورت شامل ہے۔ انہوں نے مزید کہا کہ اگر ہڑتال مؤخر کرنے کا فیصلہ کرنا پڑا تو وہ بھی تمام چیمبرز سے مشاورت کے بعد ہی ہوگا۔
انہوں نے افواہیں پھیلانے والوں کو تنقید کا نشانہ بناتے ہوئے کہا کہ ایسے عناصر کا ہڑتال سے کوئی تعلق نہیں ہے۔
مزید پڑھیں: معروف کاروباری شخصیت عقیل آرائیں کی سالگرہ کی شاندار تقریب کا انعقاد
واضح رہے کہ ملک گیر ہڑتال کا اعلان حالیہ ٹیکس اصلاحات اور تاجر برادری کو درپیش دیگر مسائل کے خلاف کیا گیا ہے، اور اس حوالے سے تاجروں کی بڑی تعداد کی حمایت حاصل ہے۔
