رپورٹ: عدیل آزاد نوشہرہ
تاریخ: 6 نومبر 2025
پاکستان اور افغانستان کے درمیان حالیہ سرحدی کشیدگی کے بعد امن و صلح کے مذاکرات ایک مرتبہ پھر ترکی کے شہر استنبول میں شروع ہو گئے ہیں۔
یہ مذاکرات دونوں ممالک کے اعلیٰ سطحی وفود کے درمیان ہو رہے ہیں جن میں سرحدی تنازعات، دہشت گردی کے واقعات، اور مہاجرین کے مسئلے پر بات چیت کی جا رہی ہے۔
ذرائع کے مطابق، مذاکرات میں پاکستان کی نمائندگی وزارتِ خارجہ کے سینئر حکام کر رہے ہیں جبکہ افغانستان کی جانب سے طالبان حکومت کے نائب وزیرِ خارجہ شریک ہیں۔
ترکی کی وزارتِ خارجہ نے دونوں فریقین کو میزبانی کی پیشکش کی تھی تاکہ دونوں برادر ممالک کے درمیان بڑھتی ہوئی کشیدگی کو کم کیا جا سکے اور ایک پائیدار سیز فائر (جنگ بندی) معاہدہ طے پا سکے۔
گزشتہ چند ہفتوں میں سرحدی جھڑپوں اور فائرنگ کے متعدد واقعات کے باعث تعلقات کشیدہ ہو گئے تھے۔ پاکستان نے افغانستان پر دہشت گرد گروہوں کو پناہ دینے کا الزام عائد کیا تھا، جبکہ کابل حکومت نے اس الزام کو مسترد کرتے ہوئے کہا کہ وہ اپنی سرزمین کسی کے خلاف استعمال نہیں ہونے دے گی۔
ترک وزارتِ خارجہ کے ترجمان کے مطابق، “ان مذاکرات کا مقصد اعتماد سازی، رابطوں کی بحالی اور مشترکہ سیکیورٹی میکانزم کی تشکیل ہے۔”
سیاسی تجزیہ کاروں کا کہنا ہے کہ اگر یہ مذاکرات کامیاب ہو جاتے ہیں تو خطے میں امن و استحکام کے ایک نئے دور کا آغاز ہو سکتا ہے۔
