راولپنڈی(عرفان حیدر) ہارٹیکلچر ایجنسی راولپنڈی نے نئے سال کے موقع پر شہر بھر کے پارکوں کی خوبصورتی میں اضافے اور سردیوں کے موسم کے مطابق پودوں اور پھولوں کی نگہداشت کے لیے خصوصی اقدامات شروع کر دیے ہیں۔ ایم ڈی ہارٹیکلچر ایجنسی کی ہدایات پر عمل کرتے ہوئے شہریوں کو بہتر تفریحی اور محفوظ ماحول فراہم کرنے کے لیے تمام دستیاب وسائل بروئے کار لائے جا رہے ہیں۔
اس سلسلے میں ہارٹیکلچر ایجنسی راولپنڈی کے ڈائریکٹر احمد حسن رانجھا کی ہدایت پر تاریخی اہمیت کے حامل لیاقت باغ کی سجاوٹ، تزئین و آرائش اور پودوں کو سردی کے مضر اثرات سے بچانے کے لیے خصوصی انتظامات مکمل کیے گئے ہیں۔ لیاقت باغ میں لگے رنگ برنگے پھول اور سرسبز پودے بہار کا سماں پیش کر رہے ہیں، جس کے باعث باغ کی خوبصورتی شہریوں کی توجہ کا مرکز بن گئی ہے۔
مزید پڑھیں: پی ایچ اے راولپنڈی پارکس کی خوبصورتی اور عوامی سہولیات میں مصروف
نئے سال کے آغاز پر بڑی تعداد میں فیملیز لیاقت باغ کا رخ کر رہی ہیں اور فراہم کی گئی بہترین تفریحی سہولیات سے لطف اندوز ہو رہی ہیں۔ ہارٹیکلچر ایجنسی کا عملہ پوری محنت، لگن اور ذمہ داری کے ساتھ باغبانی کے امور انجام دے رہا ہے اور پودوں کی دیکھ بھال میں مصروف عمل ہے۔
اس موقع پر احمد حسن رانجھا کا کہنا تھا کہ راولپنڈی کو پنجاب حکومت کے وژن کے مطابق سرسبز اور خوبصورت بنانا ہارٹیکلچر ایجنسی کی اولین ترجیح ہے۔ انہوں نے کہا کہ شہریوں کو صحت مند اور خوشگوار تفریحی ماحول فراہم کرنے کے لیے دن رات کام کیا جا رہا ہے، جبکہ شدید سردی میں گرین بیلٹس اور پارکوں میں لگے پودوں اور پھولوں کو نقصان سے بچانے کے لیے بھی خصوصی اقدامات کیے جا رہے ہیں۔
