اسلام آباد(روشن پاکستان نیوز) دفتر خارجہ نے تصدیق کی ہے کہ پاکستان اور بھارت کے درمیان جوہری تنصیبات اور قیدیوں کی فہرستوں کا تبادلہ کیا گیا ہے۔
ترجمان طاہر حسین اندرابی نے ہفتہ وار پریس بریفنگ میں بتایا کہ فہرستیں انڈین ہائی کمشنر کے حوالے کی گئی ہیں اور یہ تبادلہ سال میں دو بار ہوتا ہے۔
انہوں نے کہا کہ پاکستان یمن کی خودمختاری اور وحدت کے لیے پرعزم ہے اور کسی بھی یکطرفہ اقدام کی مخالفت کرتا ہے۔ پاکستان سعودی عرب کے ساتھ یکجہتی کا اظہار کرتا ہے اور مسئلہ یمن کے حل کے لیے سفارتی کوششوں کی حمایت کرتا ہے۔
طاہر حسین اندرابی نے بتایا کہ اسپیکر قومی اسمبلی ایاز صادق نے خالدہ ضیا کی نماز جنازہ میں شرکت کی اور مرحومہ کے اہل خانہ سے تعزیت کی، جبکہ بنگلادیش کے نیشنل سیکیورٹی ایڈوائزر سے بھی ملاقات ہوئی۔
مزید پڑھیں:ایشیا کپ رائزنگ اسٹارز 2025،بنگلہ دیش بھارت کو شکست دیکر فائنل میں پہنچ گیا
ترجمان نے کہا کہ اسرائیل کی جانب سے صومالی لینڈ کو تسلیم کرنے کو پاکستان مسترد کرتا ہے اور صومالیہ کی خودمختاری کے عزم کا اعادہ کرتا ہے۔ نائب وزیراعظم و وزیر خارجہ اسحاق ڈار نے اس معاملے پر او آئی سی اور دیگر ممالک کے وزرائے خارجہ کے ساتھ اعلامیہ جاری کیا ہے۔
انہوں نے بتایا کہ اسحاق ڈار کو تبوک کے گورنر اور ازبکستان کے وزیر خارجہ نے ٹیلیفون کیا، جہاں دونوں ممالک کے تعلقات اور ازبکستان کے صدر کے پاکستان دورے پر بات ہوئی۔ صومالیہ کے وزیر خارجہ نے بھی شکریہ ادا کیا۔
نائب وزیراعظم و وزیر خارجہ اسحاق ڈار چین کا دورہ کریں گے اور پاک چین اسٹریٹیجک ڈائیلاگ میں شرکت کریں گے۔
افغانستان کے ساتھ سرحد بند ہونے کے بعد سفارت خانہ پاکستانی شہریوں سے رابطے میں ہے اور کابل میں طالبان حکام سے بھی رابطہ قائم رکھا گیا ہے۔ اب تک 1100 سے زائد پاکستانیوں نے کابل میں سفارت خانے سے رابطہ کیا ہے۔
