اسلام آباد (روشن پاکستان نیوز)الیکشن کمیشن کی اعلیٰ سطحی کمیٹی نے راولپنڈی کے سابق کمشنر لیاقت چٹھہ کے انتخابات میں دھاندلی کے الزامات کی تحقیقات مکمل کر لیں۔
ذرائع کا کہنا ہے کہ الیکشن کمیشن کی تحقیقاتی کمیٹی کا آخری اجلاس آج ہے، کمیٹی سابق کمشنر راولپنڈی کے الزامات پر رپورٹ کو حتمی شکل دے گی، کمیٹی آج اپنی تحقیقاتی رپورٹ الیکشن کمیشن کو پیش کرے گی۔
ذرائع کے مطابق راولپنڈی ڈویژن کے تمام ڈی آر اوز اور متعلقہ آر اوز کے بیانات بھی رپورٹ کا حصہ ہیں، ڈی آر اوز اور آر اوز نے راولپنڈی کے سابق کمشنر کے الزامات کو دوٹوک الفاظ میں مسترد کردیا۔
ذرائع کا کہنا ہے کہ کمیٹی نے راولپنڈی ڈویژن کے تمام 6 ڈی آر اوز کے تحریری بیانات قلمبند کیے جب کہ راولپنڈی میں قومی اسمبلی کے 13 اور صوبائی اسمبلی کے 26 آر اوز کے بیانات بھی قلمبند کیے گئے۔
سابق کمشنر کے الزامات کی پریس کانفرنس کا ٹرانسکرپٹ بھی رپورٹ کا حصہ ہے۔
