ریاض(روشن پاکستان نیوز) سعودی عرب کی وزارت حج و عمرہ نے حرمین شریفین میں ہر قسم کی فوٹوگرافی اور ویڈیو ریکارڈنگ پر مکمل پابندی عائد کرنے کا اعلان کیا ہے۔
نئی پالیسی کے مطابق مکہ مکرمہ کے مسجد الحرام اور مدینہ منورہ کے مسجد النبی میں موبائل فونز، پروفیشنل کیمرے اور دیگر ریکارڈنگ ڈیوائسز کے ذریعے تصویریں لینے پر پابندی ہوگی، اور یہ ہدایت آئندہ حج سیزن سے نافذ العمل ہوگی۔
وزارت حج و عمرہ کا کہنا ہے کہ پابندی کی وجہ زائرین کے رویے اور حرمین میں رش کے دوران پیدا ہونے والی مشکلات ہیں۔فوٹوگرافی کے باعث نماز کے دوران تاخیر، اہم عبادتی مقامات پر رش اور ذاتی جگہ کی خلاف ورزی سے تنازعات پیدا ہوتے ہیں۔
وزارت نے واضح کیا ہے کہ پابندی کا مقصد عبادت کے دوران زائرین کی توجہ مرکوز رکھنا ہے۔
مزید پڑھیں: جدہ میں پاکستانی حج والنٹیئرز کے اعزاز میں تقریبِ تقسیمِ اسناد منعقد
قبل ازیں فوٹوگرافی پر ہلکی نوعیت کی ہدایات دی جاتی تھیں، جیسے سلفیز اور پوز دیے گئے شاٹس سے گریز کرنا یا دوسروں کی اجازت کے بغیر تصویریں نہ لینا۔ تاہم، نئی پالیسی میں یہ اصول مکمل پابندی میں تبدیل کر دیے گئے ہیں اور سیکیورٹی اہلکار پابندی کے نفاذ کے ذمہ دار ہوں گے۔
وزارت نے کہا ہے کہ یہ قانون دیگر مقدس مقامات پر بھی لاگو ہوگا جو حج کے روٹ سے منسلک ہیں۔
وزارت کے ایک اہلکار نے بتایا کہ یہ اقدام مقامی انتظامیہ اور بین الاقوامی وفود کی بڑھتی ہوئی تشویش کے پیش نظر کیا گیا ہے تاکہ عبادت کے دوران خلل کو ختم کیا جا سکے اور زائرین کے لیے محفوظ اور منظم ماحول فراہم کیا جا سکے۔
