واشنگٹن(روشن پاکستان نیوز) امن کا نوبیل انعام حاصل کرنے والی ماریا کورینا ماچاڈو نے اپنا انعام وینزویلا کے عوام اور امریکی صدر ٹرمپ کے نام کردیا۔
اپنے بیان میں انہوں نے کہا کہ یہ ایوارڈ وینزویلا کے شہریوں کی جدوجہد کا بڑا اعتراف ہے، ہم فتح کے دہانے پر کھڑے ہیں۔
ماریا کورینا ماچاڈو نے کہا کہ وینزویلا کی آزادی اور جمہوریت کے لیے صدر ٹرمپ، امریکی عوام اور جمہوری قوتوں کی مدد درکارہے۔
انہوں نے مزید کہا کہ یہ ایوارڈ وینزویلا کے مصیبت زدہ لوگوں اور صدر ٹرمپ کی ہمارے مقصد کی فیصلہ کن حمایت کے نام کرتی ہوں۔
دوسری جانب امریکی صدر ڈونلڈ ٹرمپ کو امن کا نوبیل انعام نہ ملنے پر وائٹ ہاؤس کا ردعمل بھی سامنے آگیا۔
مزید پڑھیں: نوبیل امن انعام : ٹرمپ کی شدید خواہش پوری ہوگی یا کل دل ٹوٹے گا؟
ترجمان وائٹ ہاؤس اسٹیون چیونگ نے اپنے بیان میں کہا کہ نوبیل کمیٹی نے ثابت کیا کہ وہ سیاست کو امن پر ترجیح دیتے ہیں۔
اسٹیون چیونگ نے کہا کہ صدر ٹرمپ امن معاہدے کرتے رہیں گے، صدر ٹرمپ جنگیں ختم کرتے رہیں گے اور جانیں بچاتے رہیں گے۔
خیال رہے کہ آج سوئیڈن کی رائل سوئیڈش اکیڈمی آف سائنس کے سربراہ جورجین واٹن فریڈنس نے نوبیل امن انعام 2025 اعلان کرتے ہوئے کہا کہ امن کا نوبیل انعام وینزویلا کی جمہوریت نواز رہنما ماریہ کورینا مچاڈو کو دیا جاتا ہے۔
نارویجن نوبیل کمیٹی کے مطابق ماریاکورینا مچاڈو کو وینزویلا کے عوام کے جمہوری حقوق کے فروغ اور آمریت سے جمہوریت کی منصفانہ و پُرامن منتقلی کی جدوجہد پر دیاگیا۔
