دبئی (روشن پاکستان نیوز) متحدہ عرب امارات (یو اے ای) میں ایک شخص کو بغیر اجازت گاڑی استعمال کرنے، گاڑی ضبط کروانے کے معاملے پر عدالت نے 10 ہزار درہم اور ملک بدری کا حکم جاری کر دیا۔

غیر ملکی خبر رساں ایجنسی کے مطابق یو اے ای میں اپنی ساتھی کی گاڑی بغیر اجازت استعمال کرنے، تیز رفتاری سے چلانے اور گاڑی ضبط کروانے پر عدالت نے ہرجانہ ادا کرنے کا حکم دے دیا۔

ملزم کو اس سے قبل فوجداری عدالت کی جانب سے قید، ایک سال کے لیے ڈرائیورنگ لائسنس کی معطلی، گاڑی کی ضبطی اور ملک بدری کی سزا سنائی جا چکی تھی۔

رپورٹ کے مطابق مدعیہ اور مدعا علیہ ایک ہی ادارے میں کام کرتے تھے۔ خاتون نے عدالت میں مؤقف اختیار کیا کہ مدعا علیہ اس کی گاڑی بغیر اجازت لے گیا تھا۔ اور پھر اس نے تیز رفتاری سے چلاتے ہوئے غیر ذمہ داری کا ثبوت دیا اور گاڑی بھی ضبط کروا دی۔

درخواست گزار کے مطابق اسے گاڑی چھڑوانے اور مرمت کروانے کے لیے 11 ہزار درہم خرچ کرنے پڑے۔ اور گاڑی نہ ہونے کی وجہ سے اسے کئی روز تک آمدورفت میں مشکلات کا سامنا کرنا پڑا۔

مزید پڑھیں: اسلام آباد میں جعلی حکیم کی ایماء پر صحافیوں پر حملہ — مرکزی ملزم گرفتار، دیگر حملہ آور فرار

ملزم نے عدالت سے درخواست کی کہ خاتون کا دعویٰ خارج کیا جائے کیونکہ وہ پہلے ہی اسے 9 ہزار 400 درہم ادا کر چکا ہے۔ جس ثبوت بینک سے ٹرانسفر کرائی گئی رقم کا اسٹیٹمنٹ ہے۔

عدالت نے فیصلہ دیا کہ بغیر اجازت گاڑی استعمال کرنے اور غیر محتاط رویئے کی وجہ سے ملزم کو 10 ہزار درہم ہرجانہ ادا کرنا پڑے گا۔