ممبئی (روشن پاکستان نیوز)ممبئی یوتھ کانگریس کے سربراہ کے عہدے سے ہٹائے گئے ذیشان صدیق نے کانگریس رہنما پر الزام لگایا ہے کہ راہول گاندھی کے ارد گرد موجود لوگ پارٹی کو تباہ کرنے کی کوشش کر رہے ہیں۔
بھارتی ٹی وی کے مطابق بھارتی معروف شخصیت بابا صدیق کے بیٹے، کانگریس جماعت کے ایم ایل اے ذیشان صدیق نے کانگریس جماعت کے اندر امتیازی سلوک کا الزام لگاتے ہوئے دعوی کیا کہ راہول گاندھی کی ٹیم کے رکن نے اِنہیں شرمندہ اور ذلیل کیا تھا۔
ذیشان صدیق نے مزید الزام لگاتے ہوئے کہا ہے کہ راہول گاندھی کی ٹیم بہت کرپٹ ہے۔
بابا صدیق کے بیٹے ذیشان صدیق نے مزید کہا کہ بھارت جوڈو یاترا کے دوران راہول گاندھی کی ٹیم کے ایک شخص نے اِن سے کہا کہ اگر وہ وائناڈ کے ایم پی (راہول گاندھی)سے ملنا چاہتے ہیں تو وزن کم کریں۔
ذیشان صدیق کا بتانا تھا کہ راہول گاندھی ایک اچھے لیڈر ہیں، وہ اپنا کام کرتے ہیں، ملکارجن کھرگے میرے لیے باپ کی طرح ہیں لیکن بعض اوقات، ان کی سینیارٹی کے باوجود کھرگے جی کے ہاتھ بھی بندھے ہوتے ہیں۔
ذیشان صدیق نے دعوی کیا کہ راہول گاندھی کے اردگرد جو ٹیم ہے وہ پارٹی کو اس طرح سے تباہ کر رہی ہے جیسے انہوں نے کانگریس کو ختم کرنے کے لیے کسی دوسری پارٹی سے ڈیل کی ہو۔
مزیدپڑھیں:انتخابات میں مبینہ دھاندلی: پی ٹی آئی کا سپریم کورٹ سے رجوع کرنیکا اعلان
انہوں نے اس دوران مزید کہا کہ مجھے راہول سے ملنیکے لیے وزن کم کرنے کا کہا گیا، یہ میری تذلیل کی گئی ہے، میں ایک ایم ایل اے ہوں، ممبئی یوتھ کانگریس کا سربراہ ہوں، کیا آپ کسی کو اس طرح سے شرمندہ کر سکتے ہیں۔
ذیشان صدیق نے مزید کہا کہ راہول گاندھی خود اچھا کام کر رہے ہیں لیکن وہ یہ سمجھنے سے قاصر ہیں کہ ان کی ٹیم کتنی بدتمیز ہے۔
انہوں نے مزید کہا کہ مجھے اس بات کا کوئی علم نہیں ہے کہ مجھے ممبئی یوتھ کانگریس کے سربراہ کے عہدے سے کیوں ہٹایا گیا ہے، ذیشان نے کہا کہ کوئی بات چیت نہیں ہوئی ہے، سینئر قیادت کی طرف سے کوئی کال نہیں آئی ہے۔
