مانچسٹر(روشن پاکستان نیوز):مانچسٹر ایئرپورٹ پر دو خواتین پولیس اہلکاروں پر “شدید تشدد” کرنے والے 20 سالہ محمد فاہر اماز کو عدالت نے مجرم قرار دے دیا۔ یہ واقعہ 23 جولائی 2024 کو ٹرمینل 2 پر پیش آیا جہاں پولیس کو ایک جھگڑے کی اطلاع پر بلایا گیا تھا۔
پولیس کے مطابق اماز نے گرفتاری کے دوران شدید مزاحمت کی اور خواتین پولیس اہلکاروں پر متعدد بار مکے برسائے۔ واقعے میں پولیس اہلکار پی سی لیڈیا وارڈ کی ناک ٹوٹ گئی، جبکہ پی سی ایلی کک کو بھی زدوکوب کیا گیا۔ اماز کو بالآخر ٹیزر کے ذریعے قابو میں لایا گیا۔
پی سی لیڈیا وارڈ نے عدالت میں گواہی دیتے ہوئے کہا کہ وہ واقعے کے دوران “شدید خوفزدہ” تھیں اور پولیس سروس کے دوران اتنی شدت کا تشدد کبھی نہیں جھیلا۔ انہوں نے بتایا، “مجھے یاد ہے کہ اماز نے اچانک مڑ کر میرے چہرے پر زور دار مکا مارا، اور میں زمین پر گر گئی۔ پھر سب کچھ سیاہ ہو گیا۔”
محمد فاہر اماز کا مؤقف تھا کہ وہ اپنے بھائی کی حفاظت میں یا خود کے دفاع میں عمل کر رہے تھے، لیکن لیورپول کراؤن کورٹ کے جیوری نے انہیں پی سی وارڈ پر سنگین جسمانی نقصان پہنچانے اور پی سی ایلی کک پر حملے کا مجرم قرار دے دیا۔ اماز کو ایئرپورٹ پر ایک شہری عبدالکریم اسماعیل پر حملہ کرنے کے جرم میں بھی مجرم قرار دیا گیا۔
البتہ جیوری پی سی زکری مارسڈن پر مبینہ حملے کے الزام پر کسی نتیجے پر نہ پہنچ سکی، جس پر پراسیکیوشن نے دونوں ملزمان کے خلاف دوبارہ ٹرائل کروانے کا عندیہ دیا ہے۔
مزید پڑھیں: لندن میں پی ٹی آئی احتجاج کیلئے 35 پاؤنڈ چندہ یا فیس؟ پارٹی رہنمائوں کو شدید تنقید کا سامنا
گریٹر مانچسٹر پولیس کے چیف کانسٹیبل سر اسٹیفن واٹسن نے کہا:
“اگرچہ مقدمے کے تمام نکات پر فیصلہ نہیں ہو سکا، لیکن ہم جیوری کے ان فیصلوں کا خیرمقدم کرتے ہیں جن میں مجرم کو بے نقاب کیا گیا۔ ہمارے افسران ہر ہفتے 44 مرتبہ تشدد کا نشانہ بنتے ہیں، لیکن اس قسم کے حملے کسی صورت جائز نہیں۔”
گریٹر مانچسٹر پولیس فیڈریشن کے چیئرمین مائیک پیک نے کہا:
“ہمارے افسران روز ایسے خطرناک حالات کا سامنا کرتے ہیں۔ مانچسٹر ایئرپورٹ کے واقعے میں شریک اہلکاروں کو ہم نے مکمل معاونت فراہم کی ہے اور کرتے رہیں گے۔”
پراسیکیوٹر پال گرینی کے سی نے بتایا کہ پی سی مارسڈن پر حملے کے الزام میں دوبارہ ٹرائل کی تیاری کی جا رہی ہے۔
جج نیل فلیوٹ کے سی نے محمد فاہر اماز کو حراست میں رکھنے کا حکم دیا ہے، جبکہ ان کی ضمانت کی درخواست پر سماعت جمعرات کو ہو گی۔
