نئی دہلی (روشن پاکستان نیوز) بھارتی وزیر دفاع راج ناتھ سنگھ نے دھمکی دی ہے کہ پہلگام واقعے کے بعد جوابی کارروائی کرنا ان کی ذمہ داری ہے۔ انہوں نے اس حملے میں مارے جانے والے 26 افراد کے حوالے سے کہا کہ بھارت ایسے حملوں کا مناسب جواب دینے کی صلاحیت رکھتا ہے۔
ہندوستان ٹائمز کے مطابق راج ناتھ سنگھ دہلی میں منعقدہ “سنسکرتی جاگرن مہوتسو” سے خطاب کر رہے تھے، جہاں انہوں نے کہا کہ وزیر اعظم نریندر مودی کے طرزِ عمل سے عوام بخوبی واقف ہیں، اور ان کی قیادت میں عوام کی خواہشات ضرور پوری ہوں گی۔
ان کا کہنا تھا کہ بھارت کی طاقت صرف مسلح افواج میں نہیں بلکہ اس کی ثقافت اور روحانیت میں بھی پوشیدہ ہے۔ انہوں نے کہا کہ ہمارے سپاہی میدانِ جنگ میں ملک کی جسمانی سرحدوں کی حفاظت کرتے ہیں، جبکہ ہمارے سنت اور رشی زندگی کے میدان میں روحانی اقدار کی حفاظت کرتے ہیں۔
راج ناتھ سنگھ نے مزید کہا کہ ملک کی سرحدوں کی حفاظت کرنا اور دشمن کو منہ توڑ جواب دینا ان کی ذمہ داری ہے، اور بھارت کسی بھی حملے کو برداشت نہیں کرے گا۔
