سڈنی(روشن پاکستان نیوز) آسٹریلیا کے مشرقی ساحل پر طوفان الفریڈ نے قیامت ڈھادی جس سے نظامِ زندگی درہم برہم ہوگئی، اور لاکھوں افراد بجلی سے محروم ہو گئے جبکہ درجنوں افراد زخمی ہو گئے۔
غیر ملکی میڈیا رپورٹس کے مطابق طوفان الفریڈ نے ریاست کوئنز لینڈ اور نیو ساؤتھ ویلز میں بڑے پیمانے پر تباہی مچائی۔
رپورٹ کے مطابق تیز ہواؤں کے باعث درخت جڑ سے اکھڑ گئے، کئی عمارتیں تباہ ہو گئیں اور 3 لاکھ سے زائد گھروں اور کاروباری مراکز کی بجلی معطل ہو گئی، جس سے ساڑھے 7 لاکھ افراد متاثر ہوگئے۔
پولیس حکام کے مطابق، امدادی کارروائیوں کے دوران دو فوجی ٹرک آپس میں ٹکرا گئے، جس کے نتیجے میں 36 سولجرز زخمی ہو گئے۔
مزید پڑھیں: چیمپئنز ٹرافی فائنل کےلیے میچ آفیشلز کا اعلان
ایمرجنسی سروسز کے مطابق، نیو ساؤتھ ویلز میں 16 ہزار سے زائد افراد کو فوری طور پر نقل مکانی کے احکامات جاری کیے گئے ہیں، کیونکہ آگے مزید تیز بارشوں اور ہواؤں کا خدشہ ظاہر کیا جا رہا ہے۔
آسٹریلین حکام کی جانب سے شہریوں کو محتاط رہنے اور غیر ضروری گھروں سے باہر اور نقل و حرکت سے گریز کرنے کی ہدایت کی گئی ہے۔
