لندن(صبیح ذونیر) برطانیہ کے شہر لیڈز کے آرملے ٹاؤن میں موریسن ہال لین کے سامنے سڑک پر پانی کی سپلائی لائن پھٹنے سے شہریوں کو شدید مشکلات کا سامنا ہے۔ مقامی شہریوں کی شکایات ہیں کہ پانی کی فراہمی کی بندش کی وجہ سے انہیں روزمرہ کے کاموں میں دشواری پیش آ رہی ہے۔
یارکشائر واٹر کے حکام نے اس واقعہ پر فوری ردعمل دیتے ہوئے بتایا کہ پائپ لائن کی مرمت کے کام کا جمعے تک مکمل کرلیا جائے گا۔ سڑک پر کھڑا گندا پانی نہ صرف سڑک پر چلنے والوں کے لیے پریشانی کا باعث بن رہا ہے، بلکہ موریسنز کے قریب واقع ایک سکول کے طلباء بھی اس راستے سے گزرنے پر مجبور ہیں۔
سکول جانے والے بچوں کے یونیفارم گندی پانی کی چھینٹوں سے اکثر خراب ہو جاتے ہیں، جس پر والدین اور شہریوں میں تشویش پائی جاتی ہے۔ مقامی شہریوں کا کہنا ہے کہ یہ مسئلہ کافی دنوں سے جاری ہے اور اس کے فوری حل کی ضرورت ہے۔ شہریوں نے سٹی کائونسل لیڈز سے اپیل کی ہے کہ اس مسئلے کو ترجیحی بنیادوں پر حل کیا جائے تاکہ لوگوں کو مزید پریشانی کا سامنا نہ ہو۔
مزید پڑھیں: برطانیہ اور روس کے درمیان سفارتی کشیدگی میں مزید اضافہ، روسی سفارتکار کو ملک بدر کر دیا گیا
شہریوں کا کہنا ہے کہ وہ ٹیکس دیتے ہیں اور یہ سٹی کائونسل کی ذمہ داری ہے کہ وہ فوری طور پر اس انفراسٹرکچر کے مسائل کو حل کرے تاکہ عوام کو صاف ستھری سڑکوں پر سفر کرنے کی سہولت مل سکے۔
مقامی حکام نے اس مسئلے کو تسلیم کیا ہے اور یارکشائر واٹر نے جمعہ تک پائپ لائن کی مرمت مکمل کرنے کا وعدہ کیا ہے تاکہ شہریوں کو مزید مشکلات کا سامنا نہ ہو۔مقامی شہریوں کا کہنا ہے کہ جلد ہی اس معاملے کا حل نکلنا چاہیے تاکہ سڑکوں پر جمع گندا پانی نہ صرف صحت کے لیے خطرہ بنے بلکہ اسکول جانے والے بچوں کے لیے بھی مشکلات کا باعث نہ بنے۔
