لندن (صبیح ذونیر) برطانیہ نے ایک روسی سفارتکار کو ملک بدر کر دیا ہے، جس کے بعد دونوں ممالک کے درمیان سفارتی تعلقات میں مزید کشیدگی پیدا ہو گئی ہے۔ برطانوی میڈیا کی رپورٹ کے مطابق، یہ کارروائی ماسکو کی جانب سے گزشتہ سال ایک برطانوی سفارتکار کو بے دخل کرنے کے بعد شروع ہونے والی “آنکھ مچولی” کا حصہ ہے۔
برطانوی وزیر خارجہ ڈیوڈ لامی نے اس فیصلے پر تبصرہ کرتے ہوئے کہا کہ یہ اقدام نومبر میں “روس کی جانب سے برطانوی سفارتکار کی بے دخلی” کے جواب میں کیا گیا ہے۔ روسی حکومت نے برطانوی سفارتکار پر جاسوسی اور جھوٹی معلومات فراہم کرنے کا الزام عائد کیا تھا، جس کے بعد وہ ملک چھوڑنے پر مجبور ہو گئے تھے۔ برطانوی حکومت نے اس کارروائی کی شدید مذمت کرتے ہوئے کہا کہ “ہم اپنے سفارتی عملے کو اس طرح کی دھمکیوں کو برداشت نہیں کریں گے اور اگر روس نے مزید کوئی ایسا قدم اٹھایا تو ہم اسے اشتعال انگیزی سمجھیں گے اور مناسب جواب دیں گے۔”
روس کے برطانیہ میں سفیر، آندرے کیلن، کو وزارت خارجہ میں طلب کیا گیا اور انہیں مطلع کیا گیا کہ ان کے ایک سفارتکار کی منظوری (accreditation) منسوخ کر دی گئی ہے۔ منظوری کا مطلب ہے کہ ایک حکومت کسی سفارتکار کو اپنی سرزمین پر اس کی مخصوص حیثیت اور مراعات کے ساتھ تسلیم کرتی ہے۔ برطانوی وزارت خارجہ نے کہا کہ “ہم اپنی قومی سلامتی کے تحفظ میں کسی قسم کی معذرت خواہانہ پالیسی اختیار نہیں کریں گے۔ ہمارا واضح پیغام ہے کہ اگر روس ہمارے خلاف کوئی کارروائی کرے گا تو ہم اس کا بھرپور جواب دیں گے۔”
یہ سفارتی کشیدگی اس وقت بڑھ گئی جب نومبر 2023 میں روس نے ایک برطانوی سفارتکار کی منظوری منسوخ کر دی تھی اور انہیں جاسوسی کا الزام لگا کر ملک چھوڑنے کے لیے دو ہفتے کا وقت دیا تھا۔ ان کی تصویر اور نام روسی ٹی وی پر نشر کیے گئے تھے۔
مزید پڑھیں: لیڈز: موریسنز کے سٹور کے سامنے سیوریج پائپ لائن پھٹنے سے شہریوں کو مشکلات کا سامنا
برطانیہ اور روس کے درمیان تعلقات 2022 میں یوکرین پر روسی حملے کے بعد سے مزید خراب ہو گئے ہیں۔ اس کے بعد دونوں ممالک کے درمیان سفارتکاروں کی بے دخلی معمول بنتی جا رہی ہے۔ ستمبر 2023 میں، روس نے ماسکو میں تعینات چھ برطانوی سفارتکاروں کی منظوری منسوخ کر دی تھی اور انہیں ملک چھوڑنے کا حکم دے دیا تھا۔
یقینی طور پر یہ مسلسل کشیدگی دونوں ممالک کے تعلقات پر گہرے اثرات ڈال سکتی ہے، اور دنیا بھر میں اس پر نظریں مرکوز ہیں۔
